Shavkat Mirziyoyev 2021-yil yakuniga qadar Qozog‘istonga borishi kutilayotgani haqida xabar berilgan edi. Prezident matbuot xizmati ushbu davlat tashrifning aniq sanasini ma’lum qildi.
Qayd etilishicha, davlat rahbari Qozog‘iston prezidenti Qosim-Jo‘mart To‘qayevning taklifiga binoan 5—6-dekabr kunlari Qozog‘istonda bo‘ladi.
Tashrif dasturiga muvofiq, Nur-Sulton shahrida oliy darajadagi uchrashuv va muzokaralar bo‘lib o‘tadi, ularda birodar xalqlarimiz o‘rtasidagi do‘stlik, yaxshi qo‘shnichilik va strategik sheriklik munosabatlarini yanada mustahkamlash yo‘llari ko‘rib chiqiladi.
Siyosiy muloqot va savdo-iqtisodiy hamkorlikni kengaytirish, eng avvalo, iqtisodiyotning turli tarmoqlarida amaliy aloqalar va aniq kooperatsiya loyihalarini ilgari surish, shuningdek, madaniy-gumanitar almashinuv dasturlarini faollashtirishning dolzarb masalalari ham kun tartibiga kiritilgan.
Bundan tashqari, O‘zbekiston va Qozog‘iston yetakchilari xalqaro masalalar yuzasidan fikr almashadi va mintaqaviy integratsiyaning asosiy yo‘nalishlarini muhokama qiladi.
Sammit yakunida salmoqli ikki tomonlama hujjatlar to‘plamini imzolash rejalashtirilgan. Tashrif arafasida Nur-Sultonda ikki mamlakat yetakchi kompaniya va tadbirkorlari ishtirokida biznes-forum ham o‘tkaziladi. Mavzuga doir:
