Shavkat Mirziyoyev: “Muvofiqlashtirilgan samarali choralar ko‘rilmasa, Afg‘oniston uzoq vaqt mintaqaviy xavfsizlikka yangi tahdidlar manbasi bo‘lib qolishi mumkin”

Shavkat Mirziyoyev Qozog‘istonga davlat tashrifi arafasida ushbu mamlakat nashriga ikki tomonlama munosabatlarning holati va istiqbollari hamda Markaziy Osiyodagi hamkorlikka bag‘ishlangan katta intervyu berdi. Unda prezident Afg‘onistondagi vaziyat haqida ham fikr bildirgan.

“Agar muvofiqlashtirilgan samarali choralar ko‘rilmasa, Afg‘oniston uzoq vaqt davomida mintaqaviy xavfsizlikka yangi tahdidlar va tahdidlar manbasi bo‘lib qolishi mumkin. Ushbu mamlakatda tinchlik va barqarorlikka ertaroq erishilishi uning rivojlanishiga yo‘l ochadi, mintaqaviy va xalqaro ahamiyatga molik yirik iqtisodiy va energetika loyihalarini amalga oshirish uchun yangi strategik imkoniyatlar yaratadi”, — degan prezident “Yegemen Qazaqstan” va “Kazaxstanskaya pravda” sahifalarida chop etilgan intervyuda.

Shavkat Mirziyoyevning ta’kidlashicha, Yevrosiyo va Janubiy Osiyo, Sharqiy va G‘arbiy Osiyo o‘rtasida tabiiy quruqlik ko‘prigi bo‘lgan Afg‘onistonning geografik jihatdan qulay joylashuvi uning transmintaqaviy aloqalarni rivojlantirishdagi ahamiyatini belgilaydi. Afg‘onistonning iqtisodiy jihatdan tiklanishi bu yerda barqaror va uzoq muddatli tinchlik o‘rnatishning muhim shartidir.

“Shu nuqtayi nazardan, mening fikrimcha, vaziyatning keskinlashuviga yo‘l qo‘ymaslik uchun yangi hokimiyat bilan muloqotni rivojlantirish, afg‘on xalqiga ijtimoiy-iqtisodiy va gumanitar yordam ko‘rsatishni davom ettirish zarur. Bu vaziyatda Afg‘onistonda keng ko‘lamli gumanitar inqiroz yuzaga kelishi va uning xalqaro maydonda yakkalanib qolishiga yo‘l qo‘ymaslik nihoyatda muhim ahamiyat kasb etadi”, — deb qayd etgan prezident.

Eslatib o‘tamiz, Shavkat Mirziyoyev 9-sentabr kuni bo‘lib o‘tgan O‘zLiDePning X qurultoyida “Qo‘shni Afg‘oniston zaminida tinchlik va osoyishtalikni ta’minlashga, jafokash afg‘on xalqiga qo‘limizdan kelgan barcha yordamni ayamaymiz”, — deb aytgandi. Davlat rahbari 5-oktabr kuni Turkmaniston prezidenti Gurbanguli Berdimuhamedov bilan muzokaralarda Afg‘oniston xalqiga zarur insonparvarlik yordamini ko‘rsatishni davom ettirishga tayyorligini yana bir bor aytib o‘tgan. Muzokaralarda Afg‘onistonda tinchlik va barqarorlik butun Markaziy Osiyo mintaqasida barqaror taraqqiyot garovi ekani ta’kidlangan.

Prezident 21-sentabr kuni BMT Bosh assambleyasining 76-sessiyasida Afg‘onistonni yakkalab, uni muammolar girdobiga tashlab qo‘yish mumkin emasligini, 12-noyabr kuni Turkiy kengash sammitida Afg‘onistonning yangi hukumati bilan muloqotlarda yondashuvlar umumiy va yakdil bo‘lishi lozimligini aytgandi.