Ўзбекистонда локдаун ҳолати такрорланиши мумкинми? Санитария-эпидемиология хизмати жавоб берди

Санитария-эпидемиология хизмати ижтимоий тармоқлар орқали COVID-19 инфекцияси сабаб локдаун жорий этилиши тўғрисида келиб тушган саволга жавоб берди.

Қайд этилишича, мутахассислар «Ўзбекистонда локдаун ҳолати такрорланиши мумкинми?» саволига қуйидагича жавоб берган: «Вируслардан буткул халос бўлиш мумкин эмас. Лекин тахминий нуқтаи назардан башорат қилиб кўрсак, агарда 2022 йилнинг баҳорида касаллик кўрсаткичларида яна ўсиши кузатилмаса, у ҳолда мамлакатда локдаун ҳолати эълон қилинмайди. Шундагина Жаҳон соғлиқни сақлаш ташкилоти 2022 йилнинг охирида ёки 2023 йилнинг бошида COVID-19 пандемияси тугатилганини эълон қилиши мумкин».

Эслатиб ўтамиз, 23 октябрь бўлиб ўтган матбуот анжуманида Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев Ўзбекистонда локдаун эълон қилиниш эҳтимоли ҳақида фикр билдирганди. «Бугунги кунда ҳеч қанақа локдаун ҳақида гап бўлиши мумкин эмас ва барча ҳаракатлар шунга қаратилган», — деган у.