Жиззахнинг Мирзачўл тумани, Гагарин шаҳарчасида атрофи бетонлаб юборилган дарахтлар тупроқ ерга кўчириб ўтқазилди. Бу ҳақда Экология ва атроф-муҳитни муҳофаза қилиш давлат қўмитаси хабар берди.
Эслатиб ўтамиз, ижтимоий тармоқларда дарахтлар атрофи бетонлангани ҳақида лавҳалар тарқалганди. Ҳолат Экология қўмитаси Жиззах вилояти бошқармаси томонидан ўрганилиб, «Дўстлик» МФЙ, Халқлар дўстлиги кўчасининг икки томонига экилган 75 туп дарахт атрофи «Файз-Барака» МЧЖ томонидан йўлак қуриш ишлари давомида бетонлаб юборилгани аниқланганди. МЧЖнинг ушбу ишга йўл қўйган ходимларига нисбатан расмий баённома расмийлаштирилиб, жарима белгиланган.
Дарахтларнинг барчаси: 38 туп арча, 7 туп ясин, 1 туп тут, 1 туп акация, 1 туп гилос, 4 туп қайрағоч, 7 туп Эльдар навли қарағай, 12 туп айлан дарахтларининг тагидаги бетонлар бузиб олиниб, таги юмшатилиб, парвариш қилинган.
5 декабрь куни вилоят Экология ва атроф-муҳитни муҳофаза қилиш бошқармаси ташаббуси билан бетон ариқ ёқасидаги тупроқ ерга кўчириб ўтқазилган, кўчириш имкони бўлмаган кўп йиллик дарахтлар таги юмшатилган.
Изоҳ (0)