Германиянинг жануби-ғарбий қисмида 4 декабрь, шанба куни бир двигателли А62 самолёти автомобиль кўприги устига фавқулодда қўнди ва юк машинаси ғилдиракларига бориб урилди. Бу ҳақда Пирмазенс шаҳар полициясига таяниб, «Korrespondent.net» хабар берди.
Қайд этилишича, ҳодиса тахминан соат 12:00 да (Тошкент вақти билан 15:00) содир бўлган. 72 ёшли учувчи бошқарувидаги самолёт Франциядан Қуйи Саксонияга кетаётган пайтда тўсатдан двигатель ишдан чиққан.
Учувчи қўнишга қарор қилган ва бунинг учун Рейнланд-Пфальцдаги 62-автотрассанинг Шварсбахталбрюкке кўпригини танлаган. Кўприкнинг баландлиги тахминан 100 метрни ташкил қилади.
Фавқулодда қўниш ва юк машинаси билан тўқнашув натижасида учувчи енгил тан жароҳати олган, юк машинаси ҳайдовчиси жабрланмаган. Бироқ автоҳалокат туфайли олти соатдан кўпроқ вақт давомида трассада ҳаракатланиш тўхтатилган.
Ноябрь ойида Россиянинг Иркутск вилояти яқинида Ан-12 юк ташувчи самолёти қулаб тушганди. Самолёт бортида бўлган етти кишининг ҳаммаси ҳалок бўлган.
3 декабрь куни Салвадорнинг қирғоқ зонасида бортида мамлакат мудофаа вазирининг ўғли Херардо Мерино бўлган ҳарбий самолёт ҳалокатга учраган. Кейинроқ Меринонинг жасади ва бортнинг бўлаклари топилган. Ҳодисада Меринонинг икки ҳамроҳи ҳам ҳалок бўлган.
Изоҳ (0)