Алишер Усмоновга тегишли USM компанияси VK’даги акциялари улушини сотди

Тадбиркор Алишер Усмоновга тегишли USM холдинги Россия ижтимоий тармоқларининг энг катта қисмига эгалик қилувчи VK (собиқ Mail.ru Group) корпорациясидаги барча — 57 фоиз улушини «Согаз» суғурта компанияси гуруҳига сотди. Бу ҳақда USM матбуот хизматига таяниб, Forbes хабар берди.

Холдинг VK овоз бериш акцияларининг 57,3 фоизини назорат қилувчи «МФ Технологий» устав капиталидаги иштироки билан VK акциялари пакетига эгалик қиларди. «МФ Технологий» компаниясининг 45 фоизи «Мегафон» орқали USM’га тегишли эди. Мазкур 45 фоиз улуш ва у билан бирга VK капиталидаги барча акциялар пакети «Согаз» гуруҳига сотилган. Битим суммаси ошкор этилмаган.

USM пресс-релизда Усмоновнинг сўзларидан иқтибос келтирган, «уч йил олдин мен ва ҳамкорларим VK акцияларимиз билан овоз бериш ҳуқуқини унинг раҳбариятига ўтказган эдик», — деб таъкидлаган миллиардер.

Тадбиркорнинг сўзларига кўра холдинг VK капиталидан чиқмоқда, лекин «уни аудитория сони бўйича ҳам, молиявий кўрсаткичлар бўйича ҳам энг юқори чўққида қолдирмоқда».

«МФ Теxнологий» — рақамли иқтисодиётда стратегик аҳамиятга эга лойиҳаларни амалга ошириш бўйича қўшма корхона. У 2018 йилда «МегаФон», «Газпромбанк», USM компаниялари ҳамда «Ростех» шўъба корхонаси бўлган «РТ-Развитиe Бизнеса» иштирокида ташкил этилган.

Ноябрь ойида «МФ Теxнологий» акциядорларидан бири ўзгаргани маълум бўлди. «Сбер» компания акцияларининг 36 фоизини «Газпромбанк»га 12,8 миллиард рублга сотганини эълон қилди.

«SPARK-Интерфакс» маълумотларига кўра, ҳозирда «МФ Теxнологий» компаниясининг 45 фоизи «Согаз»га, 36 фоизи «Газпромбанк»га ва 10 фоизи «РТ-Развитиt Бизнеса» компаниясига тегишли.