Мамлакатлараро ҳаракатланишга қўйилаётган чекловлар дискриминация хусусиятига эга ва пандемияга қарши курашда самара бермайди. Бу ҳақда Бирлашган Миллатлар Ташкилотининг бош котиби Антониу Гутерриш айтиб ўтди, деб ёзади Reuters.
«Бизда саёҳат хавфсизлигини таъминлашга қаратилган механизмлар мавжуд. Келинг, ушбу воситалардан фойдаланайлик-да, саёҳатда номақбул бўлган айирмачиликдан қочайлик», — деди Гутерриш.
Бош котибнинг таъкидлашича, маълум бир мамлакат ёки минтақани изоляция қилувчи чекловлар «нафақат ўта адолатсиз ва оғир, балки самарасиз ҳамдир».
У инфекция хавфини камайтириш ва иқтисодий муносабатларни сақлаб қолишнинг ягона йўли саёҳатчиларни доимий равишда текшириш ва исботланган чора-тадбирларни кўриш эканини қўшимча қилди.
Аввалроқ Жаҳон соғлиқни сақлаш ташкилоти бош директори Тедрос Гебрейесус «омикрон» штамми сабаб ҳаддан ортиқ жиддий чекловлар жорий этилаётганини маълум қилганди. ЖССТ раҳбарининг айтишича, у бир нечта давлатлар «фактларга асосланмаган ва самарали бўлмаган, аксинча, тенгсизликни кучайтирадиган умумий, қўпол чекловларни жорий этаётганидан» хавотирда.
АҚШда ноябрь ойида Жанубий Африкадан қайтган америкалик фуқарода коронавируснинг янги «омикрон» штамми қайд этилди. У мамлакатда коронавируснинг мазкур штамми аниқланган биринчи фуқаро ҳисобланади.
Коронавируснинг янги штамми сўнгги кунларда 20 дан ортиқ мамлакатда қайд этилган.
Қозоғистон «омикрон» штамми сабаб 3 декабрдан Африканинг бир нечта мамлакати ва Гонконгдан келадиган фуқароларнинг мамлакатга киришини чекламоқда. Исроил ушбу штаммнинг тарқалишининг олдини олиш мақсадида дунёда биринчи бўлиб чет эл фуқаролари учун ўз чегараларини ёпиб қўйган эди.
Саудия Арабистони ва Мальдив ороллари Жанубий Африка, Намибия, Ботсвана, Зимбабве, Мозамбик, Лесото, Эсватини ва яна бир қатор давлатларга бориш-келиш рейсларини тўхтатиб қўйди.
Бундан ташқари, Россия 28 ноябрдан бошлаб Жанубий Африка, Гонконг, Ботсвана, Лесото, Намибия, Зимбабве, Мозамбик, Мадагаскар, Эсватини ва Танзаниядан келувчи хорижликларнинг мамлакатга киришини чеклади.
Коронавируснинг кўп сонли мутацияга эга янги «омикрон» (B.1.1.529) штамми биринчи марта ноябрь ойида Жанубий Африкада топилганди. Жаҳон соғлиқни сақлаш ташкилоти маълумотларига кўра, B.1.1.529 вируси организмдаги протеин таркибига таъсир кўрсатиши мумкин. Амалдаги вакциналар эса бу каби ўзгаришларга етарлича самарадор бўлмаслиги айтилмоқда. Шунингдек, ЖССТда мавжуд дастлабки маълумотларга кўра, илгари коронавирусни бошдан ўтказган кишиларда «омикрон» билан қайта касалланиш хавфи юқори бўлиши мумкин.
Изоҳ (0)