Коррупция можароси туфайли истеъфога чиққан Австриянинг собиқ канцлери Себастьян Курс тез орада Австрия Халқ партияси (АХП) раислигини топшириши ва миллий сиёсатдан бутунлай кетишини эълон қилади. Бу ҳақда Bild ва Kronen Zeitung нашрларига таяниб, «РБК» хабар берди. Kronen Zeitung манбаларига кўра, Курс ўғли туғилгандан кейин шундай қарорга келган.
АХП собиқ канцлернинг ўзи бир неча соат ичида расмий баёнот беришини маълум қилган. Партия раиси сифатида Курснинг ўрнини Ички ишлар вазири Карл Нехаммер эгаллаши мумкин, дейди Kronen Zeitung манбалари.
Себастьян Курс 2017 йилнинг декабрида Австрия Вазирлар Маҳкамасини бошқаришга киришганди. 2021 йилнинг октябрь ойида у коррупция можароси туфайли истеъфога чиқди. Тергов Курс ва унинг энг яқин шерикларини коррупция ва ишончни суиистеъмол қилишда айблади. Канцлернинг атрофидаги одамлар Österreich газетасига пора бериб, Австрия халқ партияси ҳақида ижобий фикрлардан иборат сўровномалар ҳақида ёзишни сўраганликда гумон қилинди. Тергов версиясига кўра, мансабни суиистеъмол қилиш 2016—2018 йилларда амалга оширилган. Мамлакат Молия вазирлиги нашрдаги реклама эълонларини молиялаштириш учун бюджет маблағларидан фойдаланиб, эвазига у ерга материал жойлаштиришни талаб қилган.
Курснинг ўзи бу айбловларни рад этди. «Молия вазирлигида қандай рекламалар ёки сўровномалар буюртма қилингани устидан мен раҳбарлик қилганимни исботловчи мутлақо ҳеч қандай далиллар йўқ», — деди у. У канцлер лавозимини тарк этиш қарорини «тартибсизликдан қочиш» истаги билан изоҳлади.
Австрия собиқ ташқи ишлар вазири Александр Шалленберг 11 октябрь куни Австриянинг янги канцлери этиб тайинланди.
Ноябрь ойи ўрталарида Австрия Миллий кенгаши (парламент қуйи палатаси) Курснинг депутатлик дахлсизлигини бекор қилди. Бу Австриянинг Иқтисодий ва коррупция жиноятлари бўйича прокуратурасига сиёсатчи устидан терговни якунлаш имконини беради. Бу қарорни собиқ канцлерин ўзи ҳам қўллаб-қувватлаган. Унинг фикрича, дахлсизликнинг олиб ташланиши унга қарши бошланган жараённинг тезроқ якунланишига ёрдам беради.
Изоҳ (0)