Қозоғистон коронавируснинг янги «омикрон» штамми сабаб 3 декабрдан бошлаб Африканинг бир нечта мамлакати ва Гонконгдан келадиган фуқароларнинг мамлакатга киришини чеклайди. Шунингдек, COVID-19 нинг янги варианти аниқланган бошқа мамлакат фуқароларининг кириш тартибларини кучайтирилади. Бу ҳақда Қозоғистон соғлиқни сақлаш вазирининг биринчи ўринбосари Марат Шорановга таяниб, «Коммерсантъ» хабар берди.
Шорановнинг сўзларига кўра, Жанубий Африка Республикаси (ЖАР), Ботсвана, Лесото, Намибия, Зимбабве, Мозамбик, Мадагаскар, Эсватини, Малави, Танзания ва Гонконг фуқароларининг Қозоғистон ҳудудига кириши чекланади. Бундан ташқари, Австралия, Бельгия, Буюк Британия, Германия, Миср, Исроил, Италия, Канада, Нидерландия, Чехиядан келувчилар ПЗР тестнинг ижобий натижасини тақдим этиши шарт. Ушбу мамлакат фуқаролари, шунингдек, етти кунлик карантинга юборилади.
Қозоғистон бош вазири Асқар Мамин «вакцинация ва қайта эмлаш кўламини тегишлича таъминлашга» чақирган. «Мамлакат ичидаги эпидемиологик вазият назорати ҳам доимий бўлиши, бинолар ва транспортда ниқобда юриш, ижтимоий масофаланишга риоя қилиш амалиётини давом эттириш керак», — дейди бош вазир.
Коронавируснинг кўп сонли мутацияга эга янги «омикрон» (B.1.1.529) штамми биринчи марта ноябрь ойида Жанубий Африкада топилганди. ЖССТ маълумотларига кўра, B.1.1.529 вируси организмдаги протеин таркибига таъсир кўрсатиши мумкин. Амалдаги вакциналар бу каби ўзгаришларга етарлича самарадор бўлмаслиги айтилмоқда. Жанубий Африкадан ташқари, «омикрон» аллақачон Гонконг, Австралия ва бир қатор Ғарбий Европа мамлакатларида ҳам қайд этилган. Исроил ушбу штаммнинг тарқалишини олдини олиш мақсадида дунёда биринч бўлиб чет эл фуқаролари учун ўз чегараларини ёпиб қўйди.
Изоҳ (0)