Австралия бош вазири Скотт Моррисон ҳукумати жорий ҳафтада маҳаллий судларга ижтимоий тармоқлардан интернет-тролларнинг шахсини ошкор қилишни талаб этиш ҳуқуқини берувчи қонун лойиҳасини тақдим этади. Бу ҳақда бош вазир 28 ноябрь куни маълум қилган, деб ёзади «Коммерсантъ».
Австралия расмийларининг фикрича, бундай чора австралияликларни Facebook, Twitter ва бошқалар шу каби интернет платформаларида тажовуз ва туҳматлардан самаралироқ ҳимоялайди.
«Ижтимоий тармоқлар кўпинча анонимликдан фойдаланиб, одамларни таъқиб қиладиган, ўзини агрессив тутадиган ва оқибатини ўйламай ҳаётни барбод қиладиган қўрқоқлар учун бошпанага айланиши мумкин», — деди Моррисон. «Биз мактабларда, уйда, офисларда ёки кўчада аноним ҳужумларга жим қараб турмаймиз. Шунингдек, на онлайн, на гаджетларимизда ҳам уларга тоқат қилмаслигимиз керак. Ижтимоий тармоқларни одамлар обрўси ва ҳаётини барбод қиладиган аноним троллар босишига рухсат бера олмаймиз. Бунга чек қўйиш лозим».
Аввал жамоатчилик муҳокамасига, кейин эса парламентга юбориладиган ушбу қонун лойиҳасига мувофиқ, ҳукумат аноним интернет-тролларга қарши курашишнинг қуйидаги механизмини таклиф қилмоқда: Таъқиб ёки ҳақоратга учраган ижтимоий тармоқ фойдаланувчилари ушбу тармоқ маъмуриятига аноним профиллар қолдирган изоҳларни, шу жумладан фойдаланувчининг ўзига тегишли контентни ўчириш талаби билан шикоят қилиши мумкин. Агар ижтимоий тармоқ бундай контентни олиб ташламаса, фойдаланувчи судга мурожаат қилиш ҳуқуқига эга, бу эса ижтимоий тармоқдан аноним изоҳ эгасининг шахсини ошкор қилишни талаб этади.
Изоҳ (0)