АҚШ Мудофаа вазирлиги Америка ҳарбий кучларининг дунёдаги жойлашув тартибини баҳолаш якунланганини эълон қилди. Вазирликнинг оммавий баёнотида Россияни Европада ушлаб туриш ва Ҳинд—Тинч океани минтақасидаги иттифоқчилар билан ҳамкорликни кенгайтириш зарурлиги қайд этилган. Баҳолашга кўра, АҚШ армиясининг жойлашувида жиддий ўзгаришлар режалаштирилмаган. Бу ҳақда Associated Press баҳолаш якунига бағишланган брифингга асосланиб хабар берди.
АҚШ кучларининг Европадаги жойлашувини баҳолаш «Россия агрессиясини ушлаб туриш бўйича жанговор ҳолатни оширади, НАТО кучларига эса янада самаралироқ ишлаш имконини беради», дейилади Пентагон сайтида. Пресс-релизда аллақачон қабул қилинган бир қатор қарорлар, хусусан, Германиядаги фаол контингент сонига қўйилган чеклов олиб ташланиши қайд этилган, аммо келажакдаги чора-тадбирлар ҳақида сўз юритилмаган. АҚШнинг юқори мартабали амалдори брифингда Россияга қарши эҳтимолий чораларни айтмади, деб хабар беради Defense Оне.
Ҳисоботда АҚШнинг Гуам ва Австралиядаги ҳарбий инфратузилмасини яхшилаш зарурлиги таъкидланган, деб ёзади ОАВ. Баҳолаш натижалари махфийлаштирилди, сиёсатдаги ҳар қандай ўзгаришлардан олдин эса иттифоқчилар билан музокаралар олиб борилади, деди америкалик амалдорлар.
«Зарурий масалаларни якунлашдан олдин ушбу масалалар бўйича жамоатчиликка маълумот бериш икки томонлама музокаралар махфийлигини бузади ва муносабатларимиздаги ишончга путур етказади», — дея унинг сўзларини келтирган Military Times.
Мудофаа вазири Ллойд Остин март ойида АҚШ қуролли кучларининг дунёдаги жойлашув тартибини баҳолашни топширганди. АҚШнинг ҳозирги маъмурияти бу ишни аввалги президент Дональд Трампнинг кучларни ўзгартириш тўғрисидаги қарорларни мустақил қабул қилиш ёки уларни Twitter’да эълон қилиш каби ҳаракатларига зид деб ҳисобламоқда.
Изоҳ (0)