«Бульдозерлар, сув ташувчи машиналар ва 100 га яқин ходимлар жалб этилган». Амударёдаги ўрмонзорда содир бўлган катта ёнғин бир неча кунда ўчирилди

Қуйи Амударё Давлат биосфера резервати ўрмонзорида юзага келган ёнғин бир неча кундан сўнг ўчирилди, деб хабар беради ФВВ матбуот хизмати.

Маълум қилинишича, 27 ноябрь куни соат 17:30 да Амударё тумани Фавқулодда вазиятлар бўлимига қуйи Амударё Давлат биосфера резервати ўрмонзорида (Амударё дарёси иккига ажралган ва қайта қўшилган жойи оралиғидаги оролча) ёнғин содир бўлаётгани тўғрисида хабар келиб тушган.

Ёнғин-қутқарув экипажлари соат 19:10 да ёнғинни ўчириш ишларига киришган (туман ёнғин-қутқарув қисмидан ёнғин содир бўлган жойгача масофа тахминан 47 километрни ташкил этади). 28 ноябрь куни соат 05:15 да ёнғин қуршаб олиниб, 08:04 да ўчирилган.

Ёнғин содир бўлган жойда қайта ёнғин ўчоқлари пайдо бўлишининг олдини олиш мақсадида воқеа жойига 5 та ёнғин-қутқарув экипажи, Минтақавий қутқарув отрядидан 1 та бўлинма ва ёрдамчи техникалар, 2 та бульдозер, 2 та «погрузчик», 2 та сув ташувчи машина жалб этилган. Шунингдек, Қорақалпоғистон Республикаси ФВБдан 50 нафар, Ўрмон хўжалигидан 20 нафар, Қорақалпоғистон Экология ва атроф муҳитни муҳофаза қилиш қўмитасидан 5 нафар, туман Ободонлаштириш бўлимидан 20 нафар, жами 95 нафар ходим жалб этилиб, офатга қарши курашиш учун жойида қолдирилган ва 3 гуруҳга бўлинган ҳолда кеча-ю кундуз навбатчилик йўлга қўйилган.

Кутилмаганда ёнғин қолдиқлари қайта аланга олган ва 29 ноябрь куни соат 10:25 лар атрофида ўчиришга киришилиб, 30 ноябрь куни соат 03:30 да ўчиришга эришилган.

Таъкидланишича, ёнғиндан жабрланган ва ҳалок бўлганлар йўқ. «Назархан» овул фуқаролар йиғинидан ёнғин содир бўлган жойгача масофа тахминан 8 километрни ташкил этади.

Ҳозирда келтирилган зарар миқдори аниқланмоқда, воқеа жойида ҳамкор вазирлик, идора ва хизматлар куч-воситалари навбатчилик олиб бормоқда.

Эслатиб ўтамиз, Жиззах вилоятининг Зомин тумани «Дуоба» қишлоқ фуқаролар йиғини Ўриклисой қишлоғи яқинидаги ўрмон ҳудудларида 1 август куни йирик ёнғин юз берганди. Соат тахминан 10:40 да бошланган ёнғин салкам саккиз соатдан сўнг ўчирилган. ФВВ маълумотларига кўра, 80 гектар майдонда қуруқ ўт ва дарахтлар ёнган. Оловни ўчиришга 1600 га яқин одам жалб этилган.

2 август куни ушбу ҳудудда яна ёнғин содир бўлгани ҳақида хабарлар тарқалди. Аммо Жиззах вилояти Фавқулодда вазиятлар бошқармаси буни рад этиб, ҳудудда ёнғиндан кейинги тозалаш ишлари амалга оширилаётгани, вазият тўлиқ назорат остида эканлигини маълум қилди.