UzAutoMotors 2021 йилнинг ноябрь—декабрь ойларида автомобили етказиб берилишини кутаётган харидорларга мурожаат билан чиқиб, машиналарни етказиб бериш муддати 2 ойга кечиктирилишини маълум қилди.
Таъкидланишича, компания автомобилни етказиб бериш бўйича илгари тузилган шартноманинг 1.2 бандига мос равишда шартномага 3.1.1 бандни киритишга мажбурлигини маълум қилган.
«Бошқача айтганда, UzAuto Motors’га боғлиқ бўлмаган ҳолатлар туфайли, яримўтказгичлардан тайёрланган бутловчи қисмлар етишмовчилиги, глобал логистика муаммолари сабабли компания 3.1.1 бандини қўллашга ҳамда 3.1 бандда кўрсатилган автомобилларнинг кутилаётган етказиб бериш муддатини 2 ойга узайтиришга мажбур», — дейилади хабарда.
UzAuto Motors ушбу экстремал чора истеъмолчилар томонидан тўғри тушунилиб, қабул қилинишига умид қилмоқда.
Эслатиб ўтамиз, UzAuto Motors август ойида атиги 2 дона Gentra ва бирорта ҳам Spark ишлаб чиқармаганди. Компания буни яримўтказгичларнинг глобал танқислиги ва ишлаб чиқариш босқичма-босқич трансформация қилингани билан изоҳлаб, шу доирада ягона платформадаги автомобилларни ишлаб чиқаришга ўтиш режалаштирилганини маълум қилган эди. Сентябрь охирларида эса компания Lacetti ва Spark ишлаб чиқариш тикланганини эълон қилди. Октябрь бошида эса UzAuto Motors Lacetti ишлаб чиқариш ҳажмини оширди. Октябрь охирига бориб компания Lacetti ва Labo етказиб беришни 2 ойга кечиктирганини маълум қилди.
Изоҳ (0)