Соғлиқни сақлаш вазирлигида Тошкент шаҳридаги бир гуруҳ тиббиёт ходимлари билан ўтказилган учрашувда амалиёт учун фойдали бўлмаган, ортиқча оворагарчиликларни келтириб чиқараётган ҳужжат ва ҳисобот шаклларини қайта кўриб чиқиш ҳамда қисқартириш юзасидан мутасаддиларга топшириқлар берилди. Бу ҳақда вазирлик матбуот хизмати хабар берди.
«Тиббиёт муассасаларида ҳали-ҳануз ортиқча оворагарчиликлар барҳам топгани йўқ. Шифокорлар қабулига кириш учун беморлар баъзан соатлаб навбат кутишига тўғри келмоқда. Чунки соҳа ходимлари зиммасидаги юкламалар кўп. Уларнинг аксарияти қоғозбозлик билан боғлиқ», — дейилади хабарда.
Маълум бўлишича, тиббиёт муассасалари шифокор ва ҳамширалари ҳозир 26 турдаги журналлар, 33 турдаги ҳисобот шакллари ҳамда беморларга бериладиган ўнлаб турдаги бланкаларни тўлдиришга мажбур бўлмоқда.
Масалан, «Тиббиёт ходимларининг жароҳат ҳолатларини қайд қилиш журнали»га нохуш вазиятлар юз бермаса, ойлаб, ҳатто йиллаб эҳтиёж бўлмаслиги мумкин. Лекин ҳамшира ана шу ҳужжат турига ҳар куни «Бугун кўнгилсиз ҳолатлар содир бўлмади» деган мазмундаги қайдларни киритиб бориши шарт.
«Ваҳоланки, шифокорнинг энг асосий вазифаси одамларга шифо улашишдан иборат. У бунинг учун ҳар бир беморга ўртача 15 дақиқа вақт ажратиши керак. Бироқ амалда шундан маълум қисми ҳужжат тўлдиришга сарфланмоқда», — дея қайд этилади хабарда.
Қолаверса, беморлар қабул бўлимидан рўйхатдан ўтгач, шифокор ҳузурига кириш учун яна рўйхатга ёзилиши зарур. Ушбу ҳолатларни бартараф этиш учун айни пайтда Соғлиқни сақлаш вазирлигида тузилган ишчи гуруҳ томонидан ўрганишлар олиб борилмоқда.
Таъкидланишича, жараён якунлангач, чиқариладиган хулосалар нафақат тиббиёт ходимлари, балки аҳоли учун ҳам фойдали бўлади. «Шунда шифокор ва ҳамширалар асосий вақтини ҳисобот-у ҳужжатлар тўлдиришга эмас, балки беморларни даволашга йўналтириш имконига эга бўлади», — дейилади хабарда.
Аввалроқ соғлиқни сақлаш вазири Абдуҳаким Хожибоев лавозимидан озод этилгани, шу куннинг ўзида Ўзбекистон президентининг тегишли фармони билан бош вазир ўринбосари лавозимида ишлаб келган Беҳзод Мусаев соғлиқни сақлаш вазири этиб тайинлангани тўғрисида хабар берилганди. Шундан сўнг, ССВ ишчи гуруҳи тиббиёт тизимида ечимини кутаётган муаммо ва камчиликларни ўрганиб, зудлик билан бартараф этиш чораларини кўришга киришди. Хусусан, Беҳзод Мусаев ССВ тизимидаги талабга жавоб бермайдиган барча санитария-гигиена хоналарини таъмирдан чиқариш бўйича кўрсатма берди.
Изоҳ (0)