Чироқчида ИИО ходимлари талабига бўйсунмай, улар устига ҳайдаб, қочиб кетган ҳайдовчига жиноят иши қўзғатилди

Қашқадарё вилоятининг Чироқчи туманида ИИО ходимлари талабига бўйсунмай қочган ҳайдовчи Lacetti’сининг ойнасини уриб синдирганди, кейинчалик ҳайдовчи топилиб, автомобили вақтинча сақлаш учун жарима майдонига жойлаштирилганди. ИИВ матбуот хизмати раҳбари Шоҳрух Ғиёсов ҳолат юзасидан қўшимча маълумот тақдим этди.

Қайд этилишича, ИИО ходимларининг қонуний талабига бўйсунмасдан, атрофдагиларнинг ҳаёти ва соғлиғига хавф солган ҳолда воқеа жойидан қочиб кетган ҳайдовчи Ҳ.А.га (1998 йилда туғилган) нисбатан Чироқчи тумани прокуратураси томонидан Жиноят кодексининг 219-моддаси 1-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган ҳамда у Жиноят процессуал кодексининг 221-моддаси тартибида ушланган.

Шоҳрух Ғиёсов, шунингдек, «Ички ишлар органлари тўғрисида» ги қонунига мувофиқ, ходимларга, жиноятларга ва маъмурий ҳуқуқбузарликларга чек қўйиш учун жисмоний куч, махсус техника воситалари ёҳуд қурол ишлатиш ваколати берилганини эслатиб ўтган.

Эслатиб ўтамиз, воқеа 27 ноябрь куни Чироқчи тумани марказидаги туман Йўл ҳаракати хавфсизлиги бўлими маъмурий биноси ёнида содир бўлган 28 ноябрда эса ҳолат аск этган видеолар ижтимоий тармоқларда тарқалди.

Унда ЙПХ инспектори ва вилоят ИИБга қарашли тезкор вазифаларни бажарувчи сафарбарлик отряди вакиллари Lacetti’нинг икки ён ва олд томонидан тўсиб турганини, сўнг машина улар устига ҳайдаб, кетиб қолгани акс этган. Шунингдек, Lacetti жойидан қўзғалганида махсус отряд ходимлари уни дубинка билан урганини, оқибатда автомобилнинг орқа ойнаси синганини кўриш мумкин.

«Чироқчи марказидан Lacetti’ни бошқариб келаётганимда ЙПХ биноси олдида ЙПХ ходимлари мени тўхтатди. Кейин олд ён ойнам тонировкалиги, ҳужжатларим йўқлиги учун ойналаримни кўтариб эшигимни қулфлаб олдим», — деган ҳайдовчи. Нега ходимлар устига ҳайдадингиз, деган саволга «Қўрққанимдан, ҳаяжон тутиб», деб жавоб берган ва қилган ишидан пушаймонлигини билдирган.