Фарғона вилоятининг Тошлоқ туманида жойлашган автомобилларга суюлтирилган газ тўлдириш шохобчасида содир бўлган портлаш оқибатида ишчилар жароҳат олди. Бу ҳақда туман ҳокимининг қарорида маълум қилинган.
Маълум қилинишича, 25 ноябрь куни тахминан соат 16:42 ларда туманнинг «Варзак» маҳалла фуқаролар йиғини, Кўприкбоши кўчасида жойлашган «Олтиариқ газ тўлдириш» МЧЖнинг автомобилларга суюлтирилган газ тўлдириш шохобчасида газ-ҳаво аралашмасининг чақнаши содир бўлган.
Натижада ушбу шахобчада хизмат олиб бораётган ишчи хизматчилар — М.Й. (1959 йилда туғилган), А.А. (1962 йилда туғилган), Ж.З., О.А. (1987 йилда туғилган) А.А. (1995 йилда туғилган) тан жароҳати олиб, Республика шошилинч тиббий ёрдам илмий маркази Фарғона филиалига даволаниш учун ётқизилган.
Таъкидланишича, мазкур чақнаш оқибатида автомобилларга суюлтирилган газ тўлдириш шохобчаси бино қисми зарарланмаган.
Тошлоқ тумани ҳокимининг тегишли қарори билан туманда бахтсиз ҳодиса содир бўлганда унинг сабабларини текшириш бўйича дастлабки зарур чораларни кўриш, бахтсиз ҳодиса сабабларини текшириш комиссияси таркиби тасдиқланган.
Аввалроқ Тошкентдаги корхона ётоқхонасида содир бўлган портлаш оқибатида 18 киши жароҳат олгани, Қашқадарёда ҳаракатланаётган Nexia’нинг газ баллони портлаб кетгани, Каттақўрғондаги хонадонда портлашни юзага келтирган газ қувурлари бошқа жойга кўчирилаётгани тўғрисида хабар берилганди.
Изоҳ (0)