Тошкент шаҳрида жойлашган корхоналарнинг бирига тегишли ётоқхонада содир бўлган ҳаво-газ аралашмасининг чақнаши оқибатида ёнғин юзага келди, деб хабар беради ФВВ матбуот хизмати.
Маълум қилинишича, 29 ноябрь куни соат 05:05 да Сергели тумани Нилуфар 3-тор кўчасида жойлашган «Узмилл» МЧЖ ҳудудида ишчилар учун жойлашган ётоқхонада ёнғин содир бўлган.
Воқеа жойида 43 нафар ишчи бўлган, ёнғин оқибатида улардан 18 нафари ҳар хил турдаги куйиш тан жароҳати билан Республика шошилинч тиббий ёрдам илмий марказига жойлаштирилган. Ҳодиса оқибатида ҳалок бўлганлар йўқ.
«Воқеа содир бўлган жойга 4 та ёнғин-қутқарув экипажи соат 05:08 да етиб бориб, ёнғин соат 05:29 да қуршаб олинган ва соат 05:43 да батамом ўчирилган», — дейилади хабарда.
Таъкидланишича, ҳодиса тафсилотларини ўрганиш учун Тошкент шаҳар прокурорининг биринчи ўринбосари раҳбарлигида Тошкент шаҳар ФВБ, ИИБ, ССБ, «Ҳудудгаз таъминот» раҳбарларидан иборат тезкор тергов гуруҳи ташкил этилган.
Бирламчи маълумотга кўра, ҳаво-газ аралашмасининг чақнашига газ қувурларининг носозлиги оқибатида хонага газ тўпланиши сабаб бўлган.
Аввалроқ Сергелидаги омборхоналардан бирида газ портлаши оқибатида бир киши ҳалок бўлгани, Чилонзордаги кўп қаватли уйларнинг бирида газ портлагани тўғрисида хабар берилганди.
Изоҳ (0)