Chiroqchida IIO xodimlari talabiga bo‘ysunmay, ular ustiga haydab, qochib ketgan haydovchiga jinoyat ishi qo‘zg‘atildi

Qashqadaryo viloyatining Chiroqchi tumanida IIO xodimlari talabiga bo‘ysunmay qochgan haydovchi Lacetti’sining oynasini urib sindirgandi, keyinchalik haydovchi topilib, avtomobili vaqtincha saqlash uchun jarima maydoniga joylashtirilgandi. IIV matbuot xizmati rahbari Shohrux G‘iyosov holat yuzasidan qo‘shimcha ma’lumot taqdim etdi.

Qayd etilishicha, IIO xodimlarining qonuniy talabiga bo‘ysunmasdan, atrofdagilarning hayoti va sog‘lig‘iga xavf solgan holda voqea joyidan qochib ketgan haydovchi H.A.ga (1998-yilda tug‘ilgan) nisbatan Chiroqchi tumani prokuraturasi tomonidan Jinoyat kodeksining 219-moddasi 1-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan hamda u Jinoyat protsessual kodeksining 221-moddasi tartibida ushlangan.

Shohrux G‘iyosov, shuningdek, “Ichki ishlar organlari to‘g‘risida” gi qonuniga muvofiq, xodimlarga, jinoyatlarga va ma’muriy huquqbuzarliklarga chek qo‘yish uchun jismoniy kuch, maxsus texnika vositalari yohud qurol ishlatish vakolati berilganini eslatib o‘tgan.

Eslatib o‘tamiz, voqea 27-noyabr kuni Chiroqchi tumani markazidagi tuman Yo‘l harakati xavfsizligi bo‘limi ma’muriy binosi yonida sodir bo‘lgan 28-noyabrda esa holat ask etgan videolar ijtimoiy tarmoqlarda tarqaldi.

Unda YPX inspektori va viloyat IIBga qarashli tezkor vazifalarni bajaruvchi safarbarlik otryadi vakillari Lacetti’ning ikki yon va old tomonidan to‘sib turganini, so‘ng mashina ular ustiga haydab, ketib qolgani aks etgan. Shuningdek, Lacetti joyidan qo‘zg‘alganida maxsus otryad xodimlari uni dubinka bilan urganini, oqibatda avtomobilning orqa oynasi singanini ko‘rish mumkin.

“Chiroqchi markazidan Lacetti’ni boshqarib kelayotganimda YPX binosi oldida YPX xodimlari meni to‘xtatdi. Keyin old yon oynam tonirovkaligi, hujjatlarim yo‘qligi uchun oynalarimni ko‘tarib eshigimni qulflab oldim”, — degan haydovchi. Nega xodimlar ustiga haydadingiz, degan savolga “Qo‘rqqanimdan, hayajon tutib”, deb javob bergan va qilgan ishidan pushaymonligini bildirgan.