Энг йирик интернет-ритейлери ҳисобланувчи Amazon компанияси ходимлари дунёнинг 20 та мамлакатида «Қора жума» муносабати билан иш шароитини яхшилашни талаб қилган ҳолда иш ташлаш эълон қилди. Бу ҳақда Business Insider нашри маълумотларига таяниб, «Korrespondent.net» хабар берди.
Норозилик намойишлари Make Amazon Pay («Amazon’ни тўлашга мажбур этинг») ташаббуси доирасида 70 та халқаро касаба уюшмалари ва ташкилотлари билан коалицияда ўтказилмоқда. Улар орасида Greenpeace, Oxfam ва Amazon Workers International ҳам бор.
Таъкидланишича, 26 ноябрь куни намойишларда «нефтни қайта ишлаш заводлари, фабрикалар, омборлар, маълумотларни қайта ишлаш базалари ва корпоратив офислар» соҳасидаги ишчилар ҳам иштирок этади.
«Пандемия Amazon фойдани ўз ходимлари, жамият ва сайёрамиздан устун қўйишини кўрсатди. Amazon жуда кўп олади ва жуда кам беради. Amazon’ни тўлашга мажбур этиш вақти етди», — дейилади намойишларнинг баёнотида.
Норозилик намойишлари ходимларнинг компания меҳнат шартларига қўшилмаслиги, хусусан, узоқ иш куни, меҳнатга кам маош тўланиши ва самарадорликни баҳолашнинг мураккаб тизимлари фонида содир бўлмоқда.
Ишчилар Amazon’дан маошларни оширишни, яхши иш хавфсизлиги ва «Amazon ходимларга босим ўтказишда фойдаланган қаттиқ самарадорлик ҳамда кузатув режимини тўхтатишни» талаб қилмоқда.
Amazon намойишчилар баёнотидаги бир нечта талабларга аллақачон «катта маблағ» киритаётганини маълум қилган. Улар орасида, масалан, иқлим борасида талаблар ҳам мавжуд.
Эслатиб ўтамиз, дунёнинг бой инсонларидан бири ҳисобланувчи Жефф Безос 5 июль куни Amazon раҳбари лавозимидан кетди. Эндиликда у бошқа лойиҳаларга, хусусан, Blue Origin компаниясига кўпроқ эътибор қаратмоқчи. 20 июль куни Жефф Безос коинотда бўлиб қайтганди.
Изоҳ (0)