Toshkent viloyatida 4,8 ming dollarni noqonuniy sotishga uringan shaxs ushlandi

Toshkent viloyatida noqonuniy valyuta savdosi bilan shug‘ullangan shaxs qo‘lga olindi, deb xabar beradi Bosh prokuratura huzuridagi departament.

Ma’lum qilinishicha, departamentning Qibray tuman bo‘limi tomonidan valyuta qimmatliklarining noqonuniy muomalaga kiritilishining oldini olish yuzasidan DXX va viloyat IIBB xodimlari bilan hamkorlikda tezkor tadbir o‘tkazilgan.

Tadbir davomida Toshkent tumani hududida joylashgan kiyim-kechak savdo bozori hududida noqonuniy valyuta oldi-sotdisi bilan shug‘ullanib kelgan fuqaro A.A. o‘zining yashash uyida fuqaro S.ga jami 4,8 ming dollarni 51,8 million so‘mga sotgan vaqtida ushlangan. Shuningdek, tadbir davomida 15 383 dollar, 264 ming qozoq tengesi, 89 ming Rossiya rubli va 414,3 million so‘m ashyoviy dalil sifatida olingan.

Mazkur holat yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Toshkent viloyatida 10 ming dollarni noqonuniy sotishga uringan shaxslar ushlangani, Buxoroda 3 ming dollarni noqonuniy sotgan fuqarolarga jinoyat ishi qo‘zg‘atilgani, O‘zbekistonda 1 million dollarlik yaxlit kupyura sotayotgan shaxs ushlangani to‘g‘risida xabar berilgandi.