МИБ 3 минг нафардан ортиқ қарздорни қидирмоқда. Уларнинг мингдан ортиғи хорижда

Мажбурий ижро бюроси 3 минг 264 нафар қарздорни қидириб топиш чорасини кўрмоқда. Бу ҳақда АОКАда бўлиб ўтган брифингда бюро ахборот хизмати раҳбари Фаррух Тошпўлатов маълум қилди.

Қайд этилишича, «Суд ҳужжатлари ва бошқа органлар ҳужжатларини ижро этиш тўғрисида»ги қонунга биноан МИБнинг давлат ижрочилари томонидан қарздор ва унинг мол-мулки турган жойи ҳақида маълумотлар бўлмаганда уларни қидириш тўғрисида қарор қабул қилинади.

Хусусан, бюро органлари томонидан амалга оширилган тезкор-қидирув фаолият натижасида 2021 йилнинг ўтган даврида қарздорлиги туфайли 7 минг 800 дан зиёд жисмоний шахсга нисбатан қидирув эълон қилинган бўлиб, шундан 4 минг 500 нафардан (58 фоизи) ортиғи топилган ва мажбурий ижро ҳаракатлари ўтказилган.

Маълум бўлишича, ҳозирда 3 минг 264 нафар қарздорни қидириб топиш чоралари кўрилмоқда. Ушбу шахсларнинг 2 минг 149 таси республика ҳудудида яшириниб юргани, 1 минг 115 таси эса чет элга турли мақсадларда чиқиб кетгани аниқланган.

Таъкидланишича, қидирувдаги шахслар топилиши натижасида қарздорлардан жами 30 миллиад 700 миллион сўм (22 миллиард 800 миллион сўм алимент пули) ундирилиб, вояга етмаган фарзандларнинг моддий таъминот олиши таъминланган.

Шунингдек, 80 дан ортиқ ижро ишлари бўйича қидирувда бўлган фарзандларнинг онаси қарамоғига олиб берилиши бўйича 57 та ижро иши амалда тугатилган. Қолган ишлари бўйича қидирув ҳаракатлари давом этмоқда.

Бундан ташқари, қидирув эълон қилинган 4222 та автотранспорт воситасининг 3 минг 73 таси, яъни 73 фоизи тезкор тадбирлар натижасида топилган ва қолган 1149 та автотранспорт воситасини топиш бўйича қидирув тадбирлари давом этмоқда. Қидириб топилган машиналарнинг ундирувга қаратилиши натижасида 40 миллиард 500 миллион сўмлик қарздорлик ундирилиши таъминланган.