Buxoro viloyatining Romitan tumanida noqonuniy ravishda katta miqdordagi valyutani ayriboshlagan fuqarolarga jinoyat ishi qo‘zg‘atildi. Holat viloyat IIB hamda Iqtisodiy jinoyatlarga qarshi kurashish departamentining Romitan tuman bo‘limi xodimlari hamkorligidagi tadbirda aniqlandi, deya xabar berdi “Daryo” muxbiri.
Ta’kidlanishicha, Romitan tumanidagi “Navbahor” mahallasida yashovchi 44 yoshli fuqaro R.T. va “Yomg‘ir” mahallasining 33 yoshli fuqarosi H.A. noqonuniy ravishda valyuta ayriboshlash maqsadida oldindan jinoiy til biriktirgan.
Ular 2021-yilning 26-mart kuni tuman markazida joylashgan “Milliy taomlar” oshxonasida fuqaro M.A.ga har bir dollarini 10 ming 450 so‘mdan sotish maqsadida jami 3 ming dollarni 31 million 350 ming so‘mga ayriboshlashga kelishgan. Shu kuni soat taxminan 19:30 da huquqni muhofaza qiluvchi idoralar tomonidan tezkor tadbir o‘tkazilgan va R.T. hamda H.A. fuqaro M.A.dan kelishilgan puldan 30 million 350 ming so‘mini olayotgan vaqtda qo‘lga olingan. Holat xolislar ishtirokida rasmiylashtirilgan.
Mazkur holat yuzasidan R.T. va A.H.larga nisbatan Jinoyat kodeksining 177-moddasi 3-qismi, “v” bandi (valyuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)