Россиядан Ўзбекистонга 24 ноябрь куни биринчи «Агроэкспресс» поезди етиб келди, деб хабар бермоқда «Ўзбекистон темир йўллари» матбуот хизмати.
Ушбу поезд 17 ноябрь куни Россиянинг Тамбов шаҳридаги «Сна» станциясидан йўлга чиққан бўлиб, Қозоғистон орқали музлаткичли контейнерларда парранда гўшти олиб келинди. Қайтишда Ўзбекистондан мевалар олиб кетилиши режалаштирилган.
Лойиҳа Ўзбекистон ва Россия ўртасида логистика коридорларини ривожлантириш бўйича икки томонлама ҳамкорликни кенгайтириш доирасида амалга оширилган.
«Агросаноат комплексининг пилот контейнер партиясини ишга тушириш чегарадан ўтиш ва божхона тартиб-қоидаларини, йўлда товарлар хавфсизлиги сифатини синовдан ўтказиш имконини берди, шунингдек, кейинги қатновларга товарларни етказиб бериш жараёнини соддалаштириш ва такомиллаштириш имкониятларини кўрсатди», — деган «Ўзбекистон темир йўллари» Логистикани ривожлантириш ва рақамлаштириш бош бошқармаси бошлиғининг биринчи ўринбосари Рустам Муҳамедов.
Эслатиб ўтамиз, июнь ойида UzAgroLogistics Center агрологистика маркази, RJD Logistika АЖ ва «Россия экспорт маркази» АЖ Россия—Ўзбекистон логистика коридорини ривожлантириш ҳамда агросаноат импорт ва экспорт юкларини «Агроэкспресс» тезюрар рефрижераторли контейнерли поездларида ташиш борасида ҳамкорлик бўйича келишув имзолаганди.
Ҳужжатда «Агроэкспресс» контейнерли тезюрар темир йўл поездларининг ҳаракатини йўлга қўйиш орқали Россия—Ўзбекистон логистика коридори лойиҳасини ривожлантириш ва қўллаб-қувватлаш соҳасида томонларнинг ўзаро манфаатли ҳамкорлигини такомиллаштириш назарда тутилган. Бундан ташқари, нохом ашёвий ноэнергетик экспортни ривожлантириш, транспорт хизматлари экспорти, шунингдек, бошқа ҳамроҳ иш ва хизматларни тараққий эттириш соҳасида ҳамкорликдаги лойиҳаларни амалга ошириш кўзда тутилган.
Россия бунинг натижасида ўз ички бозорини сифатли мева ва сабзавотлар билан таъминлашни кўзламоқда, ўз навбатида Ўзбекистонга гўшт, ун ва бошқа қишлоқ хўжалиги маҳсулоти юборади. Лойиҳага Қозоғистон ҳам қўшилган.
Изоҳ (0)