Олимлар ниқоб тақмасдан ижтимоий масофа сақлаш COVID-19 дан ҳимоя қилмаслигини аниқлади

Кембриж университети олимлари бошқа ҳимоя чораларисиз атиги икки метрлик ижтимоий масофага риоя қилган ҳолда COVID-19 инфекциясидан ҳимояланиш самарадорлигини таҳлил қилди. Компьютерда моделлаштириш орқали ўтказилган тадқиқот шуни кўрсатадики, агар одам масофа сақласа-ю, аммо ниқоб тақмаса, барибир коронавирусдан ҳимояланмайди. Тадқиқотлар Physics of Fluids журналида чоп этилган, деб ёзади The Daily Telegraph.

Олимлар йўталаётган одамнинг оғзидан учиб чиқадиган томчилар унинг атрофида қандай тарқалишини ўрганди. Маълум бўлишича, агар одам ниқоб тақмаган бўлса, бу томчилар, айниқса улар жуда майда бўлса, икки метрдан узоқроққа учиб кетиши мумкин. Шу билан бирга, атрофга ёйилаётган вирусли зарраларнинг сони нафақат йўталнинг зарбига, балки атроф-муҳит ҳарорати, намлиги ва бошқа бир қатор шароитларга ҳам боғлиқ.

Олимларнинг фикрига кўра, ижтимоий масофанинг роппа-роса икки метр бўлиши ушбу рақамни эслаб қолиш осонроқ бўлгани учун ўша вақтда тасодифий танланган, аммо уни хавфсизлик кафолати деб бўлмайди.

«Биз ҳаммамиз пандемия даф бўлишини чиндан ҳам хоҳлаймиз, лекин одамларга офислар, синфхоналар, дўконлар каби ёпиқ жойларда ниқоб тақишни қатъий тавсия қиламиз. Атрофда вирус айланиб юрар экан, ўзингизни бу хатарга бошлашга ҳеч қандай асос йўқ», — деди тадқиқот раҳбари, профессор Эпаминондас Масторакос.

Британиялик олимлар аввалроқ ўлим даражаси 35 фоиз бўлган янги коронавирус штамми пайдо бўлиши мумкинлигидан огоҳлантирганди. Уларнинг сўзларига кўра, вакцинанинг қўшимча дозалари билан эмлаш, шунингдек, коронавирус тарқалиши ва чет элдан янги штаммларнинг кириб келиши хавфини минималлаштириш йўли билан ушбу сценарийнинг олдини олиш мумкин.