Путин коронавирусга қарши қайта эмлангани ва бурунга пуркаладиган вакцинани ҳам синаб кўрганини маълум қилди

Россия президенти Владимир Путин коронавирусга қарши қайта эмланиш доирасида «Спутник V» вакцинасининг бурунга пуркаладиган шаклини синаб кўрганини маълум қилди, деб ёзади Meduza.

Россия президентининг сўзларига кўра, у аввалига «Спутник Лайт» билан қайта эмланган, эртаси куни кукун кўринишидаги бурунга пуркаладиган препаратни ҳам синаб кўрган. Эмлаш жараёнини Гамалея институти директорининг ўринбосари Денис Логунов олиб борган.

«Яъни бу қандай (вакцина). Бу ҳам оддий шприцда. Фақат суюқ модда ўрнига у (Логунов) кукунни тортди. У мендан учгача санашда чуқур нафас олишимни сўради ва аввал биринчи, кейин иккинчи томонга (препаратни) пуркади. Кейин 15 дақиқа ўтирдим, шу билан жараён тугади», — деди у

Путиннинг аниқлик киритишича, эмлашдан кейин у ҳеч қандай салбий таъсир сезмаган ва 24 ноябрь куни бемалол спорт билан шуғулланган.

Владимир Путин 23 март куни коронавирусга қарши вакцинанинг биринчи дозаси билан эмланганди. Путин омма олдида эмланишдан бош тортган. 14 апрель куни эса Путин вакцинанинг иккинчи дозасини қабул қилган. Унинг қайси вакцина билан эмлангани номаълум эди. Кремль бу маълумотни ошкор қилишдан бош тортганди. Кейинроқ тўғридан-тўғри эфирдаги халқ билан мулоқот чоғида президентнинг ўзи «Спутник V» билан эмланганини маълум қилган.

21 ноябрь куни Логунов билан учрашувда Путин «Спутник Лайт» орқали коронавирусга қарши қайта эмланганини маълум қилди. Шунингдек, у «Спутник V» вакцинасининг бурунга пуркайдиган шаклини синовдан ўтказишда иштирок этиш истагида эканини билдирган.

Сентябрь охирида АҚШ президенти Жо Байден коронавирусга қарши вакцинанинг учинчи — бустер дозасини олгани хабар қилинганди.