Туркманистон аҳолисига Қорақум чўлидаги «Жаҳаннам дарвозаси» сайёҳлик объектига ташриф буюриш тақиқланди

Туркманистон аҳолисига Қорақум чўлидаги Дарваза газ кратери (чуқурлик)га махсус рухсатсиз ташриф буюриш тақиқланди. Бу ҳақда «Хроника Туркменистана» хабар берди.

Ушбу машҳур сайёҳлик объекти 1971 йилда Совет геологлари бу жойда ерости гази тўпланганини аниқлаган вақтда пайдо бўлган. Ўрнатилган газ платформаси бўшлиққа тушиб кетиб, чуқур кратер ҳосил қилган. Одамлар ва чорва моллари учун зарарли бўлган газлар ҳавога чиқишига йўл қўймаслик мақсадида улар бу ерга ўт қўйишга қарор қилган. Геологлар ёнғин бир неча кундан кейин ўчади деб ўйлаган, аммо улар адашган эди. 50 йил давомида кратердан кўтарилган газ кеча-ю кундуз тинимсиз ёнмоқда, дейилади хабарда.

Хабарга кўра, энди Дарвазага фақат «Туркменсеяҳат» давлат сайёҳлик корпорацияси рухсати билан гуруҳларга бўлинган ҳолда ташриф буюриш мумкин.

Кратердан унча узоқ бўлмаган жойда, Ахал ва Тошҳовуз вилоятларининг чегарасида Дарваза қишлоғи жойлашган бўлиб, ундан икки вилоятни боғловчи йўл ўтади. Қишлоқ аҳолиси тез-тез меҳмонларни кратерга олиб келарди. Кратерда олов ёнаётгани учун қишда чўпонлар иссиқроқ бўлади, деб ўйлаб, унинг яқинига сурув қўйларини ҳайдарди.

Полиция ходимлари кратерга постлар ўрнатиб, маҳаллий аҳолини энди у ерга яқинлашиш тақиқлангани ҳақида огоҳлантирди. Улар тақиқни газдан заҳарланиш, куйиш ёки чуқурликка тушиб кетиш эҳтимоли билан тушунтирди.

Номаълум сабабларга кўра, бу тақиқ сайёҳларга тааллуқли эмас, дейилади хабарда.

Кратер халқ орасида «Жаҳаннам дарвозаси» деб аталади. Расмийлар объектнинг номини «Қорақум ёғдулари» деб ўзгартиришга ҳаракат қилган, аммо бу ном қабул қилинмаган.