Daniya olimlari niqob taqish samaradorligi bo‘yicha tadqiqot o‘tkazdi

Niqoblar koronavirusga qarshi faqat qisman himoyani ta’minlaydi, lekin yuqtirish xavfini ikki baravar kamaytirmaydi. Bu haqda Daniya milliy kasalxonasi (Rigshospitalet) tomonidan o‘tkazilgan tadqiqotda aytilgan, deb xabar bermoqda “RBK”.

Olimlar Daniya hukumati hech qanday tavsiya va COVID-19 bo‘yicha cheklov choralarini joriy etmasidan avval tadqiqotni o‘tkazgan. Unda 6024 kishi ishtirok etgan bo‘lib, ular ikki guruhga bo‘lingan. Guruhlardan biri niqob taqishi kerak bo‘lgan.

Bir oy o‘tgach niqob taqilgan guruh ishtirokchilarning 1,8 foizi, niqobdan foydalanmaganlarining 2,1 foizi koronavirus bilan kasallangan.

“Shunday qilib, tadqiqot niqobdan foydalanadigan odamlar koronavirus bilan kasallanish xavfining kutilayotganidek ikki baravar kamayishini tasdiqlamadi. Ammo natijalar niqobning o‘rtacha himoya darajasi — 15-20 foizni ko‘rsatishi mumkin”, — deb qayd etilgan Daniya milliy kasalxonasida.

Shuningdek, olimlarning ta’kidlashicha, yuqorida qayd etilgan himoya darajasini faqat tadqiqot o‘tkazilgan sharoitda — boshqalar niqob taqmagan va jamiyatda cheklov choralari, shu jumladan, ijtimoiy masofa saqlash qoidasiga rioya qilinmagan taqdirda kutish mumkin.

Mutaxassislar niqoblarning samaradorligini kasallangan kishilarda sinovdan o‘tkazmagani, ya’ni ulardan koronavirus yuqishi himoya darajasi o‘rganilmaganini qo‘shimcha qilgan. Shu sababli tadqiqot pandemiya paytida niqobni majburiy taqish samarali chora bo‘lmaydi, degan xulosaga kelmaslik lozimligidan ogohlantirdi.

Eslatib o‘tamiz, JSSTning aprel oyida e’lon qilgan birinchi tavsiyalarida faqat kasallangan bemorlar niqob taqishlari kerakligi aytilgandi. O‘shanda niqoblar zaxirasi juda kam bo‘lgani uchun JSST rahbari niqoblardan keng aholi foydalanishi unga haqiqatan ham ko‘proq muhtoj bo‘lganlarga yetmay qolishidan xavotirlanayotganini bildirgan. Iyul oyida JSST koronavirusning oldini olish uchun niqob taqish bo‘yicha tavsiyalariga o‘zgartirish kiritdi va jamoat transporti va do‘konlarda niqob taqishni tavsiya qildi.

JSSTning rasmiy vakili Tarik Yazaryevich tibbiy niqobning o‘zi koronavirusdan himoya qilolmasligini bildirgan. “U boshqa choralar bilan birgalikda qo‘llanilishi lozim. Muammo shundaki, niqob taqqan odamlarda himoyalanganlikning yolg‘on hissi paydo bo‘lib, qo‘lni yuvish kabi boshqa narsalarni unutishi mumkin. Shuningdek, niqobni to‘g‘ri taqishni bilmasangiz, yuzingizga odatdagidan ham ko‘proq tegishni boshlaysiz”, — deb ta’kidlagan.

O‘zbekistonda 25-martdan boshlab jamoat joylarida niqobsiz yurish taqiqlangan. Niqobsiz yurgan shaxslar jarimaga tortiladi.