Швеция ҳукумати раҳбарлиги Магдалена Андерссонга топширилади. У мамлакат тарихида бош вазир лавозимини эгаллайдиган биринчи аёл

Швеция парламенти Швеция социал-демократик ишчи партияси (ССДИП) раҳбари Магдалена Андерссонни бош вазир лавозимига тайинлаш учун овоз берди. Андерссон мамлакат ҳукуматини бошқарадиган биринчи аёлга айланади.

Депутатларнинг ярмидан камроғи — 174 киши Андерссоннинг номзодига қарши бўлган. «Фақат 174 киши қарши овоз бергани учун парламент Магдалена Андерссонни бош вазир сифатида қўллаб-қувватлади», — деди Швеция парламенти спикери Андреас Норлен.

10 ноябрь куни Стефан Лёвен Швеция бош вазири лавозимидан озод этилганди, энди у ўтиш даври ҳукуматини бошқаради. Лёвен 2012 йилда ССДИП раҳбарлигини эгаллаган. Унинг қўл остида партия 2014- ва 2018 йиллардаги иккита сайловда ғалаба қозонган. 22 август куни у партия раҳбарлигидан истеъфога чиқишини эълон қилган. 4 ноябрь куни ССДИП съезди молия вазири Магдалена Андерссонни Лёвеннинг ўрнига партиянинг янги раҳбари этиб сайлади.

11 ноябрь куни парламент спикери Андреас Норлен парламентдаги партиялар билан музокаралар ўтказди. Бундан мақсад қонун чиқарувчи орган Андерссонни янги бош вазир лавозимига қабул қиладими ёки йўқми, деган саволга жавоб олиш эди. Спикер, шунингдек, Андерссонга Вазирлар Маҳкамасини шакллантиришни таклиф қилган. Андерссон сўнгги кунларда парламентдаги партиялар вакиллари билан музокаралар олиб бораётган эди.

Маълумот учун, Магдалена Андерссон 2014 йилда Швеция молия вазири лавозимини эгаллаб, ҳукуматда мазкур вазифа юклатилган биринчи аёл бўлган.