Olimlar niqob taqmasdan ijtimoiy masofa saqlash COVID-19 dan himoya qilmasligini aniqladi

Kembrij universiteti olimlari boshqa himoya choralarisiz atigi ikki metrlik ijtimoiy masofaga rioya qilgan holda COVID-19 infeksiyasidan himoyalanish samaradorligini tahlil qildi. Kompyuterda modellashtirish orqali o‘tkazilgan tadqiqot shuni ko‘rsatadiki, agar odam masofa saqlasa-yu, ammo niqob taqmasa, baribir koronavirusdan himoyalanmaydi. Tadqiqotlar Physics of Fluids jurnalida chop etilgan, deb yozadi The Daily Telegraph.

Olimlar yo‘talayotgan odamning og‘zidan uchib chiqadigan tomchilar uning atrofida qanday tarqalishini o‘rgandi. Ma’lum bo‘lishicha, agar odam niqob taqmagan bo‘lsa, bu tomchilar, ayniqsa ular juda mayda bo‘lsa, ikki metrdan uzoqroqqa uchib ketishi mumkin. Shu bilan birga, atrofga yoyilayotgan virusli zarralarning soni nafaqat yo‘talning zarbiga, balki atrof-muhit harorati, namligi va boshqa bir qator sharoitlarga ham bog‘liq.

Olimlarning fikriga ko‘ra, ijtimoiy masofaning roppa-rosa ikki metr bo‘lishi ushbu raqamni eslab qolish osonroq bo‘lgani uchun o‘sha vaqtda tasodifiy tanlangan, ammo uni xavfsizlik kafolati deb bo‘lmaydi.

“Biz hammamiz pandemiya daf bo‘lishini chindan ham xohlaymiz, lekin odamlarga ofislar, sinfxonalar, do‘konlar kabi yopiq joylarda niqob taqishni qat’iy tavsiya qilamiz. Atrofda virus aylanib yurar ekan, o‘zingizni bu xatarga boshlashga hech qanday asos yo‘q”, — dedi tadqiqot rahbari, professor Epaminondas Mastorakos.

Britaniyalik olimlar avvalroq o‘lim darajasi 35 foiz bo‘lgan yangi koronavirus shtammi paydo bo‘lishi mumkinligidan ogohlantirgandi. Ularning so‘zlariga ko‘ra, vaksinaning qo‘shimcha dozalari bilan emlash, shuningdek, koronavirus tarqalishi va chet eldan yangi shtammlarning kirib kelishi xavfini minimallashtirish yo‘li bilan ushbu ssenariyning oldini olish mumkin.