Йил давомида қанча меҳнат муҳожири Ўзбекистонга қайтиб келди? Улар ҳозир нима билан банд? Шулар ҳақида — қуйида батафсил.
2021 йилнинг январь—сентябрь ойларида 221 709 нафар фуқаро меҳнат миграциясидан Ўзбекистонга қайтиб келди. Уларнинг 70,8 фоизи (157 минг киши) эркаклар бўлса, 29,2 фоизи (64 мингдан ортиғи) аёллар. Мигрантларнинг 121,7 минг нафари (49,3 фоизи) Россиядан, 52,1 минг нафари (25,5 фоизи) Қозоғистондан, 17,5 минг нафари (11,2 фоизи) Туркиядан, 4,3 минг нафари (11,9 фоизи) Жанубий Кореядан ва 25,8 минг нафари бошқа давлатлардан қайтган.
Маълумотларга кўра, қайтган мигрантларнинг 115 861 нафари (52,3 фоизи) қурилиш, 28 717 нафари (13,0 фоизи) қишлоқ хўжалиги, 20 154 нафари (9,1 фоизи) савдо ва хизматлар, 22 818 нафари (10,3 фоизи) саноат ва ишлаб чиқариш, 1 770 нафари (0,8 фоизи) таълим, соғлиқни сақлаш, 536 нафари (0,2 фоизи) давлат органлари, банк, молия, суғурта, 31 853 нафари (14,4 фоизи) халқ хўжалигининг бошқа соҳаларида ишлаган.
Қайд этишларича, хориждан қайтган ушбу фуқаролардан 133,9 минг нафарининг бандлиги таъминланган. Жумладан,
- 104,9 минг нафари доимий иш ўринларига жойлаштирилди;
- 20,9 минг нафари касб-хунарга ўқитиш ва қайта тайёрлашга жалб қилинди;
- 3,9 минг нафарига субсидия маблағлари ажратиш ва тадбиркорлик фаолиятини бошлашга кўмаклашилди;
- 4,2 минг нафарига тадбиркорлик ва ўзини-ўзи банд қилиш фаолияти учун имтиёзли микрокредитлар ажратиш орқали бандлиги таъминланди.
Қайтган мигрантлар нима билан банд?
Меҳнат миграциясидан қайтиб келган фуқароларнинг тадбиркорлик ташаббусларини қўллаб-қувватлаш мақсадида Савдо-саноат палатаси билан ҳамкорликда «Тадбиркор мигрант» лойиҳаси доирасида қисқа муддатли ўқув курслари ташкил этилмоқда. Ҳисобот даврида хориждан қайтган 2 624 нафар (шундан Қорақалпоғистонда 281, Сирдарёда 279, Фарғонада 207, Наманганда 200, Сурхондарёда 173, Андижонда 165, Қашқадарёда 145, Хоразмда 130, Бухорода 133, Жиззахда 105, Навоийда 95, Самарқандда 57, Тошкентда 23 нафар) фуқаро Савдо-саноат палатаси ёрдамида тадбиркорлик курсларида ўқитилган.
Тадбиркорликка ўқитилган меҳнат мигрантларининг 237 нафари ҳозирда ўз тадбиркорлигини йўлга қўйган, уларнинг 90 нафарига (умумий 850,0 миллион сўм миқдорида) банк кредитлари ажратилган. Шунингдек, Ташқи меҳнат миграцияси агентлиги билан «Микрокредитбанк», «Agrobank» ва Халқ банки ўртасида ўрнатилган ҳамкорлик доирасида 2021 йилнинг биргина май ойида 15 нафар фуқарога тадбиркорлик йўналишида кредит маблағлари ажратилган.
Андижон вилояти Шаҳрихон туманида истиқомат қилувчи, 2017—2020 йилларда Россияда ишлаб қайтган Й.Абдуқодировга «Agrobank»нинг Шаҳрихон филиали томонидан 30 миллион сўм маблағ ажратилди — ҳозирда бу фуқаро чорвачилик фаолияти билан шуғуланмоқда.Шу ҳудудда истиқомат қилувчи, Россияда ишлаб қайтиб келган фуқаро М.Мўминовга ҳунарманчилик йўналишида «Agrobank» Шаҳрихон филиали томонидан 29 миллион сўм маблағ ажратилган. Ҳозирги кунда устоз-шогирд анъанаси доирасида икки нафар ишсиз ёшларга ҳунарманчиликни ўргатиб келмоқда.
Шу туманда яшовчи Б.Йўлдошевга «Agrobank» Шаҳрихон филиали томонидан 30 миллион сўм маблағ ажратилган. У ҳозирда якка тартибдаги тадбиркор сифатида давлат рўйхатидан ўтиб, Андижон бозорларини қишлоқ хўжалиги маҳсулотлари билан таъминлаб келмоқда.
Бухоро шаҳрида яшовчи меҳнат мигранти Ш.Иброҳимовага Халқ банки Бухоро шаҳри филиали томонидан 25 миллион сўм имтиёзли кредит ажратилган. Фуқаро ҳозирда ЯТТ сифатида давлат рўйхатидан ўтиб, хизмат кўрсатиш (фитобар, реклама) фаолияти билан шуғулланмоқда.
Шу ҳудудда яшовчи, Россияда ишлаб қайтган, ЯТТ очиб, паррандачилик билан шуғулланаётган О.Деҳқоновга Халқ банки Бухоро шаҳар филиали томонидан 30 миллион сўм маблағ ажратилган. У ҳозирда уч нафар ишсиз фуқарони иш билан таъминлаган.
Б.Суннатов (хизмат кўрсатиш соҳаси) ва С.Рўзиевга (чорвачилик йўналиши бўйича) «Микрокредитбанк» Бухоро шаҳар филиали томонидан 75 миллион сўмдан имтиёзли кредит ажратилган.
Жиззах вилояти Дўстлик туманида яшовчи меҳнат мигранти Ш.Сайдиевга Халқ банки Дўстлик филиали томонидан 33 миллион сўм ажратилган. Ҳозирди тикувчилик йўналишида оилавий корхона очиб, тўртта янги иш ўрни ташкил этган.
Нукусда яшовчи, 2018—2021 йиларда Туркияга бориб ишлаб келган меҳнат мигранти Ж.Жузиковага «Agrobank» Нукус шаҳри филиали томонидан 36 миллион сўм имтиёзли кредит ажратилган. У ҳозирда шаҳар марказида «Бонжоур» номли гўзаллик салони очиб, тўрт нафар ишсиз қизни ишга олган.
Шу ҳудудда истиқомат қилувчи фуқаро Г.Казакбаевага «Agrobank» Нукус филиали томонидан 33 миллион сўм маблағ ажратилган. Ҳозирда фуқаро якка тартибдаги тадбиркор сифатида давлат рўйхатидан ўтиб, ишлаб чиқариш соҳасида фаолият юритиб келмоқда.
Фарғона вилояти Учкўприк туманида истиқомат қилувчи меҳнат мигранти Н.Камоловага Халқ банки Учкўприк тумани филиали томонидан 30 миллион сўм маблағ ажратилган. Ҳозирги кунда аёл ўз хонадонида «Ширин дунё ширинликлари» цехини очган, уч нафар ишсиз хотин-қизнинг бандлигини таъминлаган.
Шу ҳудудда истиқомат қилувчи, Россияда ишлаб қайтган М.Кишивалиева, А.Қўшоқов ва М.Абдуллаевага тикувчилик соҳасида фаолият юритиши учун Халқ банки Учкўприк тумани филиали томонидан 81 миллион сўм имтиёзли кредит ажратилган.
Урганч шаҳрида яшовчи меҳнат мигранти У.Сатиповага «Микрокредитбанк» Урганч филиали томонидан 33 миллион сўм маблағ ажратилган. Тадбиркорлик фаолиятини хизмат кўрсатиш соҳасида бошлаган. «Сатипова Умида Ҳунарманд Уста» МЧЖни очиб, ҳозирда саккиз нафар ишсизнининг бандлигини шартнома асосида таъминлаган.
Изоҳ (0)