Тошкентда 7 та янги автобус йўналиши ташкил этилади

Тошкент шаҳрида 7 та янги автобус йўналишини ташкил этиш режалаштирилмоқда. Бу ҳақда пойтахт транспорт бошқармаси хабар берди.

Қайд этилишича, Тошкент шаҳар транспорт бошқармасига келиб тушаётган мурожаатлар таҳлил қилиниб, жамоат транспортига эҳтиёжи мавжуд ҳудудлар кесимида янги йўналиш чизмалари ишлаб чиқилган. «Йўловчи ташиш ҳуқуқига эга бўлган тегишли лицензияси мавжуд талабгор тадбиркорларга ўрнатилган тартибда ушбу йўналишлар бириктириб берилишини маълум қиламиз», — дейилади хабарда.

Янги автобус йўналишлари:

«Машинасозлар» метро бекатидан Мирзо Улуғбек туманидаги «Баркамол» маҳалласигача. Йўналиш масофаси — 14,3 километр;

«Чилонзор» метро бекатидан Учтепа туманидаги Бирлик мавзесигача. Йўналиш масофаси — 6,9 километр;

Сергели туманидаги «5-бекат» метро бекатидан Янгиҳаёт туманидаги «Гулзор» маҳалласигача. Йўналиш масофаси — 16,4 километр;

Яшнобод туманидаги «Қўйлиқ деҳқон бозори»дан Янгиҳаёт туманидаги «Гулзор» маҳалласигача. Йўналиш масофаси — 11 километр;

«3-бекат» метро бекатидан Яшнобод туманидаги Мўйноқ кўчасигача. Йўналиш масофаси — 8,3 километр;

«Юнусобод деҳқон бозори»дан Юнусобод туманидаги «Тикланиш» маҳалласигача. Йўналиш масофаси — 5,8 километр;

Мирзо Улуғбек туманидаги «Экобозор»дан Мирзо Улуғбек туманидаги Улуғбек шаҳарчасигача. Йўналиш масофаси — 12,5 километр.

Аввалроқ Ўзбекистон бўйлаб 310 та янги автобус йўналишлари ташкил этилиши, автобуслар ҳаракатини кузатиш имконини берадиган «Тошкент транспорти» мобил иловаси ишга туширилгани тўғрисида хабар берилганди.