Тошкент метрополитени 1 декабрдан бошлаб жетондан фойдаланиш бутунлай тўхтатилишини маълум қилди.
2020 йилнинг ноябридан бошлаб Тошкент метрополитенида йўловчилар учун жетонларни сотиш тўхтатилиб, автоматлаштирилган тўлов тизими жорий этилган эди. Шу билан бирга аҳолидаги мавжуд жетонлар қабул қилиниши давом этиб келди.
2021 йилнинг 1 декабридан бошлаб Тошкент метрополитенида йўл ҳақини тўлаш учун жетонларни қабул қилиш тўхтатилади.
Пойтахт метрополитени матбуот хизмати тўлов тизимида қулайлик яратиш мақсадида барча бекатлар QR-кодли билет, транспорт ва банк карталари ҳамда NFC орқали тўловларни амалга ошириш имконини берувчи стационар валидаторлар билан жиҳозланганини маълум қилди.
Тошкент метросида айни пайтда FacePay тизими ҳам синовдан ўтказилмоқда. Унинг ёрдамида йўловчи шунчаки валидаторга қараб йўл ҳақи учун тўлов қилиши мумкин. Бунинг учун фойдаланувчи ўз юзини сканерлаши ва уни транспорт ёки банк картаси маълумотлари билан бирга маълумотлар базасига киритиши керак бўлади.
Изоҳ (0)