«Оғриқли нуқта». Бухородаги «аҳволи қўрқинчли», беморни баттар касал қиладиган тиббиёт муассасаси ҳақида

Бухоронинг Вобкент туманидаги «Пахтакор» оилавий шифокор пункти «Қўқин», «Роҳкент» ва «Гулистон» маҳаллаларида жойлашган етти қишлоқнинг салкам 9 минг аҳолисига хизмат кўрсатади. «Дарё»га мурожаат қилган аҳоли сўзларига кўра, шифохонанинг «аҳволи қўрқинчли» — зах, совуқ, деворлари нураган, таъмирталаб. «Дарё» мухбири мурожаатни ўрганиш учун мазкур шифокор пунктида бўлди.

«Бу қўрқинчли шифохона беморни баттар касал қилади»

Мурожаатда, жумладан, шундай дейилганди: «Тиббиёт муассасаси уйимиздан анча узоқ бўлгани боис муолажаларни тўлиқ олиш учун кун бўйи шу ерда қолиб кетамиз. Аммо зах ва совуқ хоналар саломатлигини тиклаш мақсадида келган беморларга акстаъсир кўрсатади». Дарҳақиқат, 1979 йили колхоз меҳмонхонаси сифатида салобатли қилиб қурилган, 2007 йилда тиббиётга мослаштирилган бино хоналари совуқ — ташқарида ҳаво ҳарорати пасайганига қарамай, иситиш тизими ишга туширилмаган, бинонинг ҳар чеккасидан нам ва зах ҳиди анқийди; деворларнинг сувоқлари кўчиб, тўкила бошлаган.

«Ёриқ ва ямалган поллар намликни янада кўп тортмоқда. Шу аҳволда ишлашга мажбурмиз», — дейди пештоқига «Ҳамширалар хонаси» деб ёзилган, лекин ичи пунктнинг бошқа хоналари каби совуқ хонада ўтирган 10 дан ортиқ ҳамширанинг бири. Кўриб турганимиз сўнгги бир-икки йилда юзага келган ҳолат эмас — ушбу шифокор пунктида 8-9 йилдан бери ишлаётган ҳамшираларнинг таъкидлашича, «йиллар давомида аҳвол ўзгармаган». «Биз оддий ҳамшира бўлсак, начора, кўниб ишлашга мажбурмиз-да», — дея биринчи ҳамширанинг фикрини тасдиқлайди бошқаси.

Бундай зах, нам ва совуқ хоналар нафақат беморларнинг аҳволини оғирлаштириши, балки тиббиёт ходимларининг ўзини ҳам касал қилиши мумкин. «Гоҳида бир кунда уч марта муолажа олиши лозим бўлган беморлар билан кечки соат 21:00 гача қолиб, ишлашимизга тўғри келади. Бундай пайтда ўз соғлигимиз учун ҳам қайғурамиз», — дейди ҳамширалардан бири. Шифохонадаги ҳолат биринчи галда ходимлар учун ноқулайлигини бош шифокор Нафиса Ҳамроева ҳам тасдиқлайди: «Тўғри, ноқулай. Мен асли туман туғруқхонасида ишлардим, бу ерга эса уйимга яқинлиги учун келганман». Иложсизлик.

Шифохона бир неча бор, жумладан, ходимлар пулига таъмирланган

Ҳамшираларнинг сўзларига кўра, туман мутасаддилари ҳар йили икки-уч марта келиб, аҳволни ўрганади, шифокор пунктининг аянчли ҳолатини суратларга туширади ва бино таъмирланиши бўйича ваъдаларни бериб кетади. Камига бош шифокор Нафиса Ҳамроева масъул ташкилотларга 10 йилдан бери мурожаат қилиб келади, «лекин натижа йўқ».

Шу ерда ишлайдиган ҳамширалар бу жойни «иккинчи уйимиз» дейди — мутасаддиларнинг ваъадасига ишониб ўтираверсанг, «уй» охири тўкилиб тушиши мумкин, шу боис ходимлар жамоаси бир неча бор ойлик маошдан пул йиғиб («шу пулни масжидга ҳам ташлаймиз-ку», — дейди ҳамширалар), бинонинг ички қисмларини таъмирлатган.

Дарвоқе, шифохона буткул эътибордан четда қолган дейиш ҳам тўғри эмас. «Туман тиббиёт бирлашмаси томонидан ҳам маблағлар ажратилган — шу маблағларга эвазига бинонинг том қисми, эшик-деразалар, эски ‘раковина’ ва қувурлар алмаштирилди, ҳожатхона таъмирланди», — дейди бош шифокор (аммо гўёки янгиланган «раковина»ни кўриб, йиғлагинг келади, қувурлар носоз, ҳожатхона ва ювиниш хоналари ҳам ачинарли аҳволда).

Унинг бу сўзларини Вобкент туман тиббиёт бирлашмаси бошлиғи Шуҳрат Ражабов ҳам тасдиқлади. Унинг сўзларига кўра, 2019 йили томни янгилаш учун 70 миллион сўм, 2020 йили эса бино ичкарисини косметик таъмирлаш учун жами 40 миллион сўм ажратилган.

Бундай бундай тиббиёт муассасалари битта эмас

Вобкентда жами 18 та даволаш-профилактика муассасаси бор. Туман ҳокими Фарҳод Умаров «Дарё» мухбири билан суҳбатда шароити «Пахтакор» оилавий шифокор пунктиникига ўхшаш (қониқарсиз) тиббиёт муассасалари туманда бир эмас, бир нечта эканини яширмади. Масалан, хом ғиштдан қурилган «Воши», «Янгикент» ва «Чўрикалон» оилавий шифокорлик пунктларини ҳам янгилаш керак, «Ўзбакон», «Гулистон», «Пушмон» тиббий хизмат уйларининг бинолари ҳам «оғриқли нуқта» бўлиб турибди.

«Барчаси жорий таъмирланишга келиб қолган. Уларни босқичма-босқич тўлиқ қайта тиклаш ва капитал таъмирлаш ишлари амалга оширилиши режалаштирилган», — деди ҳоким. Унинг таъкидлашича, ҳозиргача туман марказий касалхонасида 396 миллион сўм эвазига ҳушёрхона биноси қуриб, фойдаланишга топширилган, қарийб 1,5 миллиард сўм эвазига марказлашган кислород станция ишга туширилган. «Шоҳнигор», «Тераклик», «Найман» оилавий шифохона пунктлари тўлиқ қайта таъмирланган.

Туман тиббиёт бирлашмаси бошлиғи Шуҳрат Ражабовнинг қўшимча қилишча, «Пахтакор» оилавий шифокорлик пункти Вазирлар Маҳкамасининг 2021 йил 22 апрелдаги «2021—2023 йилларда Бухоро вилоятининг Вобкент туманини комплекс ижтимоий-иқтисодий ривожлантириш ва камбағалликни қисқартириш чора-тадбирлари тўғрисида»ги қарори асосида 2023 йилда республика бюджети ҳисобидан 1,2 миллиард сўм маблағ эвазига реконструкция қилиниши кўзда тутилган.