Бандлик ва меҳнат муносабатлари вазирлиги ижтимоий тармоқларда Навоийда мактаб директори эмланмаган ўқитувчиларни ишдан бўшатгани тўғрисида тарқалган хабарларга муносабат билдирди.
Ижтимоий тармоқларда мактаби директори COVID-19 га қарши вакцина олмаган 20 нафар ўқитувчини ишдан бўшатгани ҳақида хабар тарқалди. Ҳолат юзасидан Навоий вилояти Бандлик бош бошқармаси Давлат меҳнат инспекцияси ўрганиш ўтказган.
Ўрганиш жараёнида мақолада кўрсатилган ҳолатлар ўз тасдиғини топган. Унга кўра, Навоий вилояти Қизилтепа туман халқ таълимига қарашли 12-умумий ўрта таълим мактаби директори ва ўқитувчиларидан тушунтириш хатлари олинган.
Юқоридагиларга асосан Давлат меҳнат инспекцияси томонидан 23 ноябрда мактаб директори номига 18/00-01/11-571-сонли ёзма кўрсатма киритилиб, буйруқлар бекор қилинган. Шунингдек, қонунбузилиш ҳолатларига йўл қўйгани сабабли мактаб директорига нисбатан Маъмурий жавобгарлик тўғрисидаги кодексининг 49-моддаси (меҳнат ва меҳнатни муҳофаза қилиш тўғрисидаги қонунчиликни бузиш) 1-қисмига асосан маъмурий жарима қўлланган.
Маълумот учун, мазкур модда билан айбланган мансабдор шахсларга БҲМнинг 5 бараваридан 10 бараваригача (2,75 миллион сўмгача) миқдорда жарима солишга сабаб бўлади.
Аввалроқ Ўзбекистонда вакцина олмаган 26 минг ходим ишдан вақтинчалик четлатилгани тўғрисида хабар берилганди.
Изоҳ (0)