Навоий вилоятида аҳоли учун берилган кўмирни ўзлаштирган шахс қўлга олинди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, 2021 йил 3 ноябрь ҳолатига «Кўмиртаъминот» МЧЖнинг Хатирчи кўмир омборида кўмир маҳсулотини қолдиғини аниқлаш юзасидан ўтказилган маркшейдерлик ўлчовида омбор мудири А.А. ва бошқалар туман аҳолиси учун имтиёзли нархларда сотилиши лозим бўлган ўзларининг моддий жавобгарлигидаги 216,9 миллион сўмлик «БР» маркали 722,4 тонна кўмир камомадига йўл қўйгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Сурхондарёда омонатга қўйилган 566 млн сўмни талон-торож қилган собиқ банк ходимига жиноят иши очилгани, Тошкентдаги кўп тармоқли клиникада бюджет маблағлари талон-торож қилингани аниқланиб, унинг мансабдор шахсларига жиноят иши қўзғатилгани ҳамда Қашқадарёда собиқ МЧЖ директори 2 429 бош чорва молини талон-торож қилгани аниқлангани ҳақида хабар берилганди.
Изоҳ (0)