Navoiy viloyatida aholi uchun berilgan ko‘mirni o‘zlashtirgan shaxs qo‘lga olindi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, 2021-yil 3-noyabr holatiga “Ko‘mirta’minot” MChJning Xatirchi ko‘mir omborida ko‘mir mahsulotini qoldig‘ini aniqlash yuzasidan o‘tkazilgan marksheyderlik o‘lchovida ombor mudiri A.A. va boshqalar tuman aholisi uchun imtiyozli narxlarda sotilishi lozim bo‘lgan o‘zlarining moddiy javobgarligidagi 216,9 million so‘mlik “BR” markali 722,4 tonna ko‘mir kamomadiga yo‘l qo‘ygani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Surxondaryoda omonatga qo‘yilgan 566 mln so‘mni talon-toroj qilgan sobiq bank xodimiga jinoyat ishi ochilgani, Toshkentdagi ko‘p tarmoqli klinikada budjet mablag‘lari talon-toroj qilingani aniqlanib, uning mansabdor shaxslariga jinoyat ishi qo‘zg‘atilgani hamda Qashqadaryoda sobiq MChJ direktori 2 429 bosh chorva molini talon-toroj qilgani aniqlangani haqida xabar berilgandi.
Izoh (0)