Ошхонадан топиш мумкин бўлган қуйидаги 5 маҳсулот шамоллаганда ёки томоқ оғриганда дардингизни ҳақиқатан ҳам енгиллаштиради.
Асал
Болаликдан ҳаммага таниш бўлган восита ҳақиқатан ҳам шамоллаш аломатларини йўқотишга ёрдам беради. Табиий асал кучли антибактериал таъсирга эга: у иммунитет тизимини мукаммал даражада мустаҳкамлайди ва яллиғланиш жараёнларининг олдини олади. Бундан ташқари, асал антиоксидантлар — фенолик кислоталар ва флавоноидларнинг манбаси ҳисобланади. Улар ҳужайраларни эркин радикалларнинг шикастланишидан ишончли ҳимоя қилади, тери ҳолатини яхшилайди ва қаришнинг олдини олади. Чой ёки қаҳва ичганингизда бир қошиқ асал истеъмол қилинг. Асосийси, асални иссиқ суюқликда эритиб юбормасликдир: юқори ҳарорат таъсирида у фойдали хусусиятларини йўқотади ва қўшимча углеводларга айланади.
Туз
Томоқ оғриганда шўр сув билан чайиш яхши ёрдам беради. Туз бактерияларни ўлдирадиган ва яллиғланиш билан фаол курашадиган антисептик ҳисобланади. Бир стакан қайноқ сувга бир чой қошиқ тузни эритиб, сув илигунча кутинг. Эритма билан иложи борича тез-тез чайинг (иложи бўлса кунига 6 мартагача). Натижа узоқ куттирмайди: бир неча кундан кейин аҳволингиз яхшиланганини сезасиз.
Лимон шарбати
Яна бир ажойиб антибактериал восита бу — табиий лимон шарбати. У витамин C ва табиий мева кислоталарига бой бўлиб, иммунитет тизимини мустаҳкамлайди ва касаллик қўзғатувчи бактерияларни ўлдиради. Бир стакан илиқ сувга янги сиқилган яримта лимон шарбатини қўшинг ва кунига бир неча марта томоғингизни чайинг.
Ичимлик содаси
Томоқни чайқаш учун яна бир шифобахш ингредиент. Таъми ёқимли эмас-у, лекин кўплаб дорилар ушбу воситанинг самарадорлиги олдида ип эшолмайди. Сода ҳам худди туз каби яллиғланиш ва бактериялар билан курашишга ёрдам берадиган кучли табиий антисептикдир. Агарда туз ва содани аралаштириб томоқни чайсангиз, даволаш икки баравар самарали бўлади.
Ҳилба уруғлари
Ҳилба уруғлари энг кучли табиий антисептиклардан биридир. Улар оғриқни енгиллаштиради, яллиғланишни камайтиради. Ҳилбадан шифобахш булён тайёрлаш мумкин. Бунинг учун бир литр совуқ сув ва 3 ош қошиқ уруғ керак бўлади. Уруғларни 4-5 соатга ивитиб, 10-15 дақиқа давомида қайнатинг. Уни ичиш ёки томоқни чайиш мумкин. Бундай булён нафақат шамоллашга қарши ёрдам беради, балки овқат ҳазм қилишни яхшилайди.
Мавзуга доир:
Изоҳ (0)