Парҳезшунослар томонидан ҳақиқий витаминларнинг кони экани айтиладиган клюквада антиоксидант ва клетчаткалар бисёр. Пектин, фенокислота, катехин, бетаин, макро ва микро элементларнинг кони ҳисобланган мазкур меванинг таркибида B, РР, К1, С гуруҳи витаминларидан ташқари, калий, фосфор, темир, марганец, кальций, йод ва рух моддаси ҳам лиммо-лим. Яна қандай фойдали хусусиятлари борлиги ҳақида эса қуйида маълумот бериб ўтамиз.
Энг яхши антиоксидантлардан бири
Зарарли радикалларнинг оксидловчи таъсирини нейтраллаштиргани сабаб ҳам клюква энг яхши антиоксидантлардан саналади. Кундалик рациондан ўрин олса, киши ўзини яхши ҳис қилади.
Яллиғланишга қарши самара беради
Таркибидаги фитонутриентлар яллиғланишнинг олдини олади, халқ табобатида клюквадан оғиз бўшлиғи яллиғланишини даволашда фойдаланилади ва сийдик тизимидаги инфекцияларга қарши курашишда самарали восита ҳисобланади.
Иммунитетни мустаҳкамлайди
C ва B витаминининг кони ҳисоблагани учун совуқ мавсумда ушбу маҳсулот айни муддао ҳисобланади. Қолаверса, шамоллаш ва гриппга қарши курашишда ҳам яхши самара беради.
Қон-томирлар ва жигарни тозалайди
Антибактериал ва вирусга қарши самара бериш хусусиятига эга экани сабаб, жигар, шунингдек, организмни тозалайди. Қон-томир тизимига ижобий таъсир қилиб, холестерин тўпланиши ва тромб пайдо бўлишининг олдини олади, қон айланишини яхшилайди. Шу сабаб ҳам бошқа мевалар қўшилмаган клюквадан тайёрланган табиий морс ичиш тавсия қилинади. Қондаги қанд миқдорини меъёр бўлишини таъминлайди. Таркибида шакарнинг кам экани клюквани бошқа мевалардан ажратиб туради. Шунинг ҳисобига унинг истеъмолидан кейин қондаги қанд миқдори кўпайиб кетмайди. Ундан тайёрланган соус ёғли таомлар учун айни муддао.
Ҳазм жараёнини яхшилайди
Витаминга бой мева иштаҳани яхшилаб, ҳазм жараёнини меъёрлаштиради. Унда ошқозон-ичак тракти фаолиятини яхшилайдиган клетчаткалар бисёр бўлади. Вазнни меъёрда бўлишига ҳисса қўшишдан ташқари, қоринни тўқ тутиб, ортиқча овқатланишнинг олдини олади.
Калорияси кам экани билан ўзига хос
Унинг бир сиқимида атиги 50 калория борлигидан келиб чиқилса, клюквани парҳез қилаётганлар учун энг яхши маҳсулот деб ҳисоблаш мумкин. Шу сабаб ҳам уни бўтқа, йогурт, смузи ва бошқа егуликларга қўшиш тавсия қилинади.
Мавзуга доир:
Изоҳ (0)