АҚШ президенти Жо Байден ўз ваколатларини бир муддат вице-президент Камала Харрисга топширади. Бу ҳақда Оқ уй матбуот котиби Жен Псаки маълум қилди.
Псакининг сўзларига кўра, 19 ноябрь куни эрталаб давлат раҳбари Мериленд штатининг Бетесда шаҳридаги Уолтер Рид тиббиёт марказига режали кўрикдан ўтиш учун борган. У колоноскопиядан ўтади.
«2002 ва 2007 йилларда президент Жорж Буш мисолида бўлгани каби ва АҚШ Конституциясида белгиланган тартибга мувофиқ, президент Байден наркоз остида бўлган пайтда қисқа муддатга ҳокимиятни вице-президентга ўтказади», — дейилади Псакининг баёноти.
Унинг сўзларига кўра, 19 ноябрь оқшомида Оқ уй президентнинг тиббий кўрикдан ўтгани ҳақидаги ёзма ҳисоботни эълон қилади.
Байден колоноскопиядан 79 ёшга тўлишидан бир кун олдин ўтмоқда. ABC News хабарига кўра, Байден охирги марта сайлов кампанияси вақтида тўлиқ тиббий кўрикдан ўтган. 2019 йил декабрь ойида тиббий ҳисоботда Байден «президентлик вазифаларини муваффақиятли бажаришга яроқли, соғлом, бақувват 77 ёшли эркак» деб эълон қилинган.
Президент лавозимига киришишидан бироз олдин, шифокорлар Байденга бир нечта ташхис қўйган: унда юрак уриши ритмида нотекислик, қонда ёғлар ёки липидлар концентрациясининг ошиши ва қизилўнгачда айрим муаммолар қайд этилган.
Ўтмишда Байденнинг сўғлиғида кузатилган энг жиддий муаммолар 1988 йилда унинг бошидаги қон томирлари кенгайиши бўлган. 2020 йилнинг ноябрь ойида Байден ит билан ўйнаётган вақтда йиқилиб оёғи шикастланган эди. Компьютер томографиясида унинг суякларидаги ёриқлар аниқланган.
Изоҳ (0)