Буюк Британия бош вазири Борис Жонсон Пекинда ўтказиладиган Олимпиадага дипломатик бойкот эълон қилиш имкониятини кўриб чиқмоқда, деб хабар беради «Коммерсантъ». Ушбу ғояни ташқи ишлар вазири Элизабет Трасс қўллаб-қувватлаган.
Буюк Британия ҳукуматида Хитойдаги инсон ҳуқуқлари билан боғлиқ вазиятга норозилик сифатида бойкот эълон қилиш бўйича «фаол муҳокама» давом этмоқда. Вариантлардан бирига кўра, вазирлар Олимпиада ўйинларига бормайди. Шу билан бирга, расмийлар мамлакат элчисининг Хитойда бўлишига рухсат бериши мумкин. The Times газетасининг ёзишича, Жонсон ташқи ишлар вазири Трассдан кўра «анча эҳтиёткор». Олдинроқ бош вазир тўлиқ спорт бойкотини истисно этганди.
Жамоатлар палатаси депутатлари ёзда ҳукуматни 2022 йили Пекинда ўтказиладиган Олимпиадада иштирок этишдан воз кечишга чақирган эди. Дипломатик бойкот масаласини АҚШ ҳам кўриб чиқаётган бўлиши мумкин. Президент Байден буни инкор этмаган. Пекин эса Вашингтоннинг режаларини қоралаган.
Пекиндаги XXIV қишки Олимпиада ўйинлари 2022 йилнинг 4 февралидан 20 февралига қадар бўлиб ўтади.
Эслатиб ўтамиз, 200 га яқин инсон ҳуқуқларини ҳимоя қилиш ташкилотлари Хитойда ўтказилиши керак бўлган 2022 йилги Олимпиадани бойкот қилишга даъват қилган эди. Бунинг сабаби Шинжон-Уйғур автоном вилоятида инсон ҳуқуқлари оммавий равишда бузилгани ҳақидаги хабарлар бўлиб, уларда миллиондан ортиқ мусулмон уйғурлар асирлик лагерларида сақланаётгани таъкидланган.
АҚШ Давлат департаментининг 30 март куни эълон қилган инсон ҳуқуқлари бўйича йиллик ҳисоботида Хитойнинг Шинжондаги сиёсати «геноцид» деб таърифланган. «Хитой ҳукумат идоралари асосан мусулмон бўлган уйғурларга қарши геноцид ва инсониятга қарши жиноятлар, шу жумладан, қамоқ, қийноқлар, мажбурий стерилизация, уйғурлар ва бошқа диний ҳамда этник озчиликлар вакилларини таъқиб қилиш сингари ҳаракатларни амалга оширмоқда», — дейилади ҳисоботда.
Изоҳ (0)