Ўзбекистонда коррупция ҳақида хабар берганларнинг қариндошлари ҳам давлат ҳимоясида бўлиши белгиланди

Ўзбекистонда коррупция ҳақида хабар берганларнинг қариндошлари ҳам давлат ҳимоясида бўлади. Бу ҳақда Адлия вазирлигининг «Ҳуқуқий ахборот» канали хабар берди.

Маълум қилинишича, Ўзбекистоннинг коррупцияга қарши курашиш тизимини такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисидаги қонун 18 ноябрь куни президент томонидан имзоланди.

Киритилган қўшимчаларга кўра, Коррупцияга қарши курашиш агентлиги ходимлари коррупциявий ҳуқуқбузарликлар содир этилишини ўрганиш ва таҳлил қилиш учун жазони ижро этиш муассасаларига монеликсиз киришга, ҳужжатлар билан танишишга ҳақли экани белгиланди.

Коррупцияга қарши курашиш агентлиги томонидан ҳар йили коррупцияга қарши курашиш тўғрисидаги миллий маърузани Олий Мажлисга тақдим этади.

Эндиликда коррупцияга оид ҳуқуқбузарликлар тўғрисида ахборот бераётган шахсларнинг қариндошлари ҳам давлат ҳимоясида бўлади (илгари фақат хабар берган шахслар назарда тутилган.)

Қонун расмий эълон қилинган кундан эътиборан кучга киради.

Эслатиб ўтамиз, Ўзбекистонда коррупция ҳолатлари ҳақида Коррупцияга қарши кураш агентлигини хабардор қилиш имконини берувчи махсус дастурий таъминот ишлаб чиқилган.

Интернет тармоғидаги мазкур «eanticor.uz» дастури тест режимида ишга туширилган бўлиб, унда коррупция ҳолатлари ҳақидаги мурожаатларни тўртта шаклда, яъни:

• «Коррупцияга дуч келдим ва пора беришга мажбур бўлдим»;
• «Коррупцияга дуч келдим ва пора бермадим»;
• «Пора билан боғлиқ бўлмаган коррупцияга дуч келдим»;
• «Ҳалол ишлайдиган давлат хизматчисини учратдим» каби мавзуларда юбориш мумкин.