Олий Мажлис Сенатининг навбатдаги ялпи мажлисида сенаторлар «Фавқулодда ҳолат тўғрисида»ги Конституциявий қонун, «Гидрометеорология фаолияти тўғрисида»ги қонунни кўриб чиқиши тўғрисида хабар берилганди. Парламент юқори палатаси матбуот хизматининг маълум қилишича, сенаторлар «Фавқулодда ҳолат тўғрисида»ги Конституциявий қонунни маъқуллаган.
Маълум қилинишича, қонунда фавқулодда ҳолатни жорий этишда вужудга келадиган муносабатларни тартибга солишга қаратилган нормалар акс эттирилган. Хусусан, фавқулодда ҳолатни жорий этиш шартлари ва тартиби, қўлланиладиган чоралар ва чеклашлар, фавқулодда ҳолат амал қиладиган давр учун жорий этиладиган махсус давлат бошқарув органлари, фавқулодда ҳолат шароитида жисмоний ва юридик шахслар, шунингдек, мансабдор шахс ҳуқуқларининг кафолатлари, фавқулодда ҳолат шароитларида судларнинг фаолиятини тартибга солувчи ва бошқа махсус қоидалар мустаҳкамлаб қўйилмоқда.
Қонунда фавқулодда чоралар, уларнинг таъсири доираси, Ўзбекистон фуқаролари, чет эл фуқаролари, фуқаролиги бўлмаган шахслар, юридик шахслар ҳуқуқ ва эркинликларига ўрнатилаётган вақтинчалик чекловлар, уларга юклатилаётган қўшимча мажбуриятлар, кучга кириш вақти ҳамда амал қилиш муддати каби бир қанча чоралар тартибга солинмоқда.
Қонун билан республика бўйича жорий этиладиган фавқулодда ҳолатнинг амал қилиш муддати 30 суткадан, унинг айрим жойларида жорий этиладиган фавқулодда ҳолатнинг амал қилиш муддати эса 60 суткадан ошиши мумкин эмас. Агар фавқулодда ҳолатни жорий этиш мақсадларига эришилмаган бўлса, фавқулодда ҳолатнинг амал қилиши Ўзбекистон президентининг фармони билан яна бир муддатга узайтирилиши мумкин. Лекин мазкур фармон парламент қўшма мажлисида тасдиқланиши белгиланмоқда.
Шунингдек, қонун билан фавқулодда ҳолат жорий қилингани ҳақида чегарадош давлатларга дипломатик каналлар орқали хабар берилиши ҳам белгилаб қўйилмоқда. Қонун сенаторлар томонидан маъқулланган.
Изоҳ (0)