2021 йил 18 ноябрь куни Москва шаҳрида Ўзбекистон ташқи ишлар вазири Абдулазиз Комилов Россия ташқи ишлар вазири Сергей Лавров билан учрашди. Бу ҳақда Ўзбекистон ТИВ матбуот хизмати хабар берди.
Маълум қилинишича, ташқи сиёсат маҳкамалар раҳбарлари олий даражадаги Россияга кутилаётган ташрифга томонларнинг тайёрлиги юқори даражада эканини мамнуният билан қайд этган ҳамда давлатлараро муносабатларнинг долзарб масалаларини муҳокама қилган.
Икки мамлакатнинг халқаро ва минтақавий ташкилотлар доирасида яқин алоқаларни давом эттириш ва ўзаро қўллаб-қувватлашга тайёрлиги билдирилган. Афғонистондаги вазият юзасидан фикр алмашилган.
«2022 йил Ўзбекистон ва Россия ўртасида дипломатик муносабатлар ўрнатилганининг 30 йиллиги нишонланади. Биз ҳамкорликда ушбу муҳим санани нишонлаш учун йирик ижтимоий ва маданий тадбирлар ўтказиш бўйича махсус дастур ишлаб чиқдик», — дейди Абдулазиз Комилов.
Учрашув якунида вазирлар ахборот ва биологик хавфсизлик соҳасида қатор икки томонлама ҳужжатлар, шунингдек, Ўзбекистон Ташқи ишлар вазирлиги ва Россия Ташқи ишлар вазирлиги ўртасида 2022—2023 йилларга мўлжалланган ҳамкорлик дастурини имзолаган.
Аввалроқ Ўзбекистон президенти Шавкат Мирзиёев Россия президенти Владимир Путиннинг таклифига биноан ташриф билан Россияга жўнаб кетгани тўғрисида хабар берилганди. Учрашувда икки мамлакат ўртасидаги стратегик шериклик ва иттифоқчилик муносабатларини янада мустаҳкамлаш масалалари муҳокама қилиниши, қатор ҳужжатлар имзоланиши режалаштирилган.
Изоҳ (0)