Quinnipiac университети томонидан ўтказилган сўнгги сўровларга АҚШ президенти Жо Байденнинг фаолиятини америкаликларнинг 36 фоизигина маъқулламоқда, деб хабар беради «Коммерсантъ». Бу янги тарихий минимум ҳисобланади. Бундан олдинги энг паст натижа октябрь ойида — сўров иштирокчиларининг 38 фоизини уни қўллаб-қувватланган вақтда қайд этилганди.
Респондентларнинг 53 фоизи Байденнинг фаолиятини маъқулламайди (бир ой олдинги натижадан 1 фоизга кўп). Америкаликлар президентнинг ишини тўрт соҳада энг ёмон дея баҳолаган: иқтисодиёт (Жо Байден фаолиятини 34 фоизи қўллаб-қувватлаган), коронавирус пандемиясига қарши кураш (45 фоиз), ташқи сиёсат (33 фоиз), иқлим ўзгаришларига қарши кураш (41 фоиз).
Сўров иштирокчиларининг қарийб ярми (51 фоизи) президентни тўғри инсон деб ҳисобламайди, 42 фоизи бунинг аксини билдирган. Респондентларнинг 57 фоизи у яхши етакчилик қобилиятларига эга эмас деган бўлса, сўров иштирокчиларининг 37 фоизи бунга қўшилмаган. Шунингдек, 56 фоиз респондент амалдаги АҚШ администрациясини нокомпетент деб атаган, 40 фоизи эса бунинг аксини билдирган.
Байденнинг рейтингини жанубий чегарадаги иммиграцион инқироз, Афғонистондаги ва мамлакат иқтисодиётидаги вазият пасайтириб юборди. Охирги сўров шуни кўрсатдики, АҚШ фуқароларининг сиёсатдан узоқ бўлган ва ўзини демократлар ёки республикачилар тарафдори деб ҳисобламайдиган қисми Америка президентини энг кўп танқид қилади.
Аввалроқ Байден АҚШнинг 1,2 трлн долларлик инфратузилма режасини имзолагани, Байден Эрондан нефть харид қилмаслик учун дунёда етарлича захира борлигини маълум қилгани тўғрисида хабар берилганди.
Изоҳ (0)