AQSh prezidenti Jo Bayden Vakillar palatasi tomonidan noyabr boshida qabul qilingan mamlakatdagi infratuzilma loyihalarni 1,2 trillion dollarga moliyalashtirish to‘g‘risidagi qonunni imzoladi. Oq uyda o‘tkazilgan tantanali imzolash marosimida u hujjatning qabul qilinishi demokrat va respublikachilarning natijalar uchun birlashishi mumkinligini ko‘rsatganini ta’kidladi, deb xabar beradi “Kommersant”.
“Barcha mavjud narsalarni olishni istaganimiz sabab Vashingtonda juda tez-tez hech narsa qilinmaydi. Ushbu qonun bilan biz boshlagan ishimizni yakunlashga e’tibor qaratdik”, — deydi Bayden.
Qonun transport va elektr aloqasi uchun federal moliyalashtirishni oshirish, internetdan foydalanish imkoniyatini kengaytirish, suv ta’minoti tizimini yaxshilash va iqlim o‘zgarishi ta’siridan himoya qilishni nazarda tutadi. Uning qabul qilinishi AQSh Demokratlar partiyasining ichki fraksiyasida bahslarga sabab bo‘lgan, shuning uchun Bayden ovoz berish kuni Delaverga safarini qoldirishga majbur bo‘lgan. AQSh prezidentining qabul qilinmagan yana bir tashabbusi — ijtimoiy xarajatlarni oshirish to‘g‘risidagi “Qayta quramiz va yaxshiroq” qonun loyihasi.
Eslatib o‘tamiz, aprel oyida Jo Bayden amerikaliklarga 1,8 trillion dollarlik yordam rejasini taqdim etgan va boylar uchun soliqlarni oshirish taklifini bergandi. Rejaga ko‘ra, o‘n yil davomida bir trillion dollar ta’lim va bolalar parvarishi sohalariga, yana 800 milliard dollar o‘rtacha va past daromadli oilalar uchun soliq imtiyozlariga yo‘naltirilishi kerak edi.
Izoh (0)