Францияда қочоқлар Ла-Манш орқали Британияга сузиб ўтишга уринаётгани учун спорт дўконларида қайиқ сотиш тўхтатилди

Decathlon спорт товарлари тармоғи Франция шимолидаги дўконларида каноэ ва байдаркалар сотишни тўхтатди. Британияга боришни истаган муҳожирларнинг Ла-Манш бўғозини кесиб ўтишда улардан фойдаланишига йўл қўймаслик учун шундай қилинган, деб ёзади BBC.

Қайиқлар фақат Франциянинг Англия билан сувли чегарасига бевосита туташган Кале шаҳри ва Гранд Сент коммунасидаги савдо нуқталаридан олиб ташланди, мамлакатнинг қолган қисмида уларни бемалол сотиб олиш мумкин.

Расмий баёнотга кўра, Decathlon бу қадамни муҳожирларнинг ўзидан ташвишланиш билан оқламоқда, Ла-Манш орқали Британияга етиб боришга уриниш уларнинг ҳаёти учун хавфлидир. «Бунинг устида баҳслашиб бўлмайди, чунки ўтган куни учта қочоқ каноэда бўғозни забт этишга қарор қилиб, изсиз ғойиб бўлди. Бу ‘спортчи-байдарчиларънинг кичик бир қисми холос, мингдан ортиқ муҳожирлар бир вақтнинг ўзида Туманли Албионга қайиқда боришга ҳаракат қиладиган кунлар ҳам бўлади, жорий йил бошидан буён «меҳмонлар» бундай саргузаштга 14 минг мартадан ортиқ йўл олган», — дейилади баёнотда.

Шуниси эътиборга лойиқки, айнан Decathlon муҳожирларнинг қайиқ сотиб олиш учун севимли жойларидан бирига айланган. Дўконлар тармоғи Дюнкирк яқинида қулай тарзда жойлашган бўлиб, у ердан Англиягача «бир қадам». Шунинг учун, мамнун мижозлар қариндошлари ва дўстлари билан хариддан сўнг дарҳол ушбу қизиқарли саёҳатда ўз кучини синаб кўришга ошиқади.

Сўнгги кунларда муҳожирлар Францияда туриб Туманли Албионни шу тарзда қамал қилмоқда. Ҳозир Буюк Британиянинг қоқ рўпарасида жойлашган Кале порт шаҳрида Осиё ва Шимолий Африка мамлакатларидан келган бир неча минг муҳожирлар тўпланган. Улар Францияда қолишни истамасдан, Буюк Британияга жойлашиш учун қайиқларда бўғозни кесиб ўтишга интилмоқда, Англияда улар анча катта моддий ёрдамга умид қилмоқда. Бироқ Британия чегарачилари ҳукуматдан қатъий буйруқ олагн: қочқинларни ушлаб, уларни қитъага қайтариш. Биргина ўтган жума ва шанба кунлари соҳилни қўриқлаш кемалари Туманли Албионга боришга уринган 1100 кишини қайтариб юборди.

Парижда бу амалиёт «ғайриинсоний» деб аталди. Франция полицияси муҳожирларнинг Ла-Манш бўйлаб сузиб ўтишига унчалик тўсқинлик қилмаяпти. Ҳукуматда Каледа кенг ёйилган «меҳмонлар» лагерини назорат қилиш учун ҳам, қочқинларнинг қайиқларини кузатиш учун ҳам етарли маблағ йўқ. Лондондан садо чиқмаяпти. Бироқ французлар омадсизликка учраган сузувчиларга ёрдам беришда давом этмоқда. Масалан, 16 ноябрь куни маҳаллий чегара хизмати 272 кишини сувдан қутқариб олди. Аммо Елисей саройи муҳожирларга босимни кучайтирмоқда. Хусусан, яқинда мамлакат шимолида қочқинлар лагери бузиб ташланган, полиция ўнлаб контрабандачиларни қўлга олган.