AQSh prezidenti Jo Bayden administratsiyasi Saudiya Arabistoniga 650 million dollarlik qurol-yarog‘larni sotish borasidagi bitimni ma’qulladi, deb xabar beradi “Interfaks”.

2018-yil oxirida AQSh Senati Saudiya Arabistonini Yaman bilan mojaroda qo‘llab-quvvatlashni to‘xtatish va Saudiya Arabistoni valiahd shahzodasi Muhammad bin Salmon jurnalist Jamol Qoshiqchining o‘ldirilishida javobgarligi borasidagi rezolyutsiyani ma’qullagan edi.

AQShning o‘sha vaqtdagi prezidenti Donald Tramp Saudiya Arabistonini qo‘llab-quvvatlashni to‘xtatish borasidagi rezolyutsiyaga veto qo‘ygan va valiahd shahzodaning Qoshiqchi o‘limiga aloqasi ma’lum bo‘lsa-da, qurol sotishni davom etgan.

AQSh davlat kotibi Entoni Blinken fevral oyida Bayden Saudiya Arabistoni bilan hamkorlik Amerika qadriyatlarini aks ettirishi kerakligini aytganini ma’lum qilgandi. Uning qo‘shimcha qilishicha, Vashington “Saudiya Arabistonining faollar, dissidentlar va jurnalistlarga qarshi eksterritorial tahdid va hujumlarini to‘xtatish” zarur va Qo‘shma Shtatlar bunga toqat qilmaydi.

O‘sha oyning o‘zida Bayden Saudiya Arabistonining Yamanga hujumini qo‘llab-quvvatlashni rasman to‘xtatgan. Shu bilan birga, Vashington Ar-Riyodni mintaqadagi muhim ittifoqdosh sifatida ko‘rishda davom etmoqda.

Ma’lumot uchun, Yamanda 2014-yil avgustidan beri fuqarolar urushi davom etmoqda. Unda Saudiya Arabistoni tomonidan qo‘llab-quvvatlanayotgan amaldagi prezident Abd Rabbu Mansur Hodiy bir tomon, isyonchi xusiylar ikkinchi tomon bo‘lib kurash olib bormoqda.