Украина президенти Владимир Зеленский Украина Миллий хавфсизлик ва мудофаа кенгашининг 2021 йил 20 августдаги Россия Федерацияси разведка ва махсус хизматларининг 28 нафар ходимига нисбатан санкциялар қўллаш тўғрисидаги қарорини кучга киритиш тўғрисидаги фармонни имзолади. Бу ҳақда «Интерфакс» хабар берди.
Хабарга кўра, тегишли 584/2021-сонли ҳужжат давлат раҳбарининг веб-сайтида эълон қилинган ва у эълон қилинган кундан эътиборан кучга киради.
Санкциялар ушбу шахсларнинг Украинадаги активларини музлатиш, савдо операцияларини чеклаш, Украина ҳудуди орқали ресурслар транзити, парвозлар ва ташишларни чеклаш, қисман ёки тўлиқ тўхтатиш, Украинадан капитал олиб чиқиб кетишига йўл қўймаслик, иқтисодий ва молиявий мажбуриятларни бажаришни тўхтатиш, лицензиялар ва бошқа рухсатномаларни бекор қилиш ёки амал қилишини тугатиш, давлат мулкини хусусийлаштириш ва ижарага беришда иштирок этишини тақиқлаш кабиларни назарда тутади.
Бундан ташқари, чекловлар рўйхатига Украина сувларига хорижий ҳарбий ва ҳарбий бўлмаган кемаларнинг киришини тақиқлаш, Украина миллий банкининг инвестиция киритиш учун рухсатномалар беришини тақиқлаш, Украинага чет эл валютасини олиб кириш ёки олиб чиқиш учун рухсатномалар беришни тўхтатиш, тўлов карталаридаги маблағни нақд пулга алмаштиришни чеклаш, технология ва ҳуқуқларни интеллектуал мулкка ўтказишни тақиқлаш ва Украинанинг барча давлат мукофотларидан маҳрум қилиш киради.
Шунингдек, қўллаш бўйича амалдаги қонунчиликда белгиланган тамойилларига мос келадиган бошқа санкциялар ҳам жорий қилиниши мумкин.
Россия Федерацияси разведка ва махсус хизматлари ходимларига нисбатан санкциялар қўллаш тўғрисидаги қарор 20 август куни бўлиб ўтган йиғилишда Украина Хавфсизлик хизмати таклифи билан Миллий хавфсизлик ва мудофаа кенгаши томонидан қабул қилинганди. Қайд этилишича, ушбу шахслар «Қрим ва Донбассдаги босқинчи ҳукуматга ёрдам беришда иштирок этмоқда, шунингдек, улар босиб олинган ҳудудларда Россия ҳикояларини сингдирмоқда».
Изоҳ (0)