Зоир Мирзаев — Тошкент вилоятининг охирги беш йилдаги олтинчи ҳокими. Вилоятнинг барча ҳокимлари — битта суратда

Тошкент вилояти ҳокими 2021 йилнинг 18 ноябрь куни 16 марта ўзгарди (Ўзбекистоннинг бошқа ҳеч бир ҳудудида ҳокимлар бу қадар кўп ўзгармаган) — вилоятнинг Чирчиқ шаҳрига ҳоким қилиб юборилган Даврон Ҳидоятов ўрнини икки йил Қашқадарёга ҳокимлик қилган Зоир Мирзаев эгаллади.

Даврон Ҳидоятов Тошкент вилоятини бир йил ҳам бошқармаган ҳокимлар сафини тўлдирди. У 9 ой 19 кун ҳокимлик қилди — бу борада унинг кўрсаткичи Шукрулло Бобоевникидан ҳам ёмон (у ҳам 2016—2017 йилларда 10 ой 15 кун ҳокимлик қилган), лекин Содиқ Абдуллаев (6 ой 8 кун) ва Исломжон Эргашхўжаевникидан (4 ой 3 кун) яхшироқ. Қайд этиш жоиз, Тошкент вилояти ҳокими 2016 йил августидан бери олти марта ўзгарди.

Сўнгги тайинловда ўзига хос рамзийлик ҳам бор — бундан уч йил аввал, 2019 йилнинг октябри охирида Тошкент вилоятининг Оққўрғон туманида юз берган можароли ҳолат сабаб ҳукумат таркибидан четлатилган Зоир Мирзаев орадан уч йил ўтиб бутун Тошкент вилоятига ҳоким бўлиб қайтди. Қайд этиш жоиз, Мирзаев учун бу учинчи ҳокимлик лавозимидир — бунгача у, Қашқадарёдан ташқари, Самарқанд вилоятига ҳам (2010—2016 йилларда) раҳбарлик қилган.