Jinoyat ishlari bo‘yicha Yangihayot tumani sudida uch kunlik chaqalog‘ini sotishga uringan ayol ustidan sud majlisi bo‘lib o‘tdi. Bu haqda “Yoshlar” telekanalining “Yangi davr” informatsion dasturida ma’lum qilindi.
Kadr: Telegram
Ma’lum qilinishicha, 1993-yili Andijon viloyatida tug‘ilgan, oilali T. moddiy manfaat uchun 3 kunlik chaqalog‘ini sotishga uringan vaqtida Bosh prokuratura huzuridagi departament va tuman IIB xodimlari tomonidan ashyoviy dalillar bilan qo‘lga olingan.
Ma’lumotlarga ko‘ra, sudlanuvchi ayol bundan yetti yil oldin 1987-yilda tug‘ilgan erkak bilan shar’iy nikohdan o‘tgan va u bilan yashab kelgan. Ikki nafar farzandi dunyoga kelgach, ular qonuniy nikohdan o‘tgan, ammo oilaviy mojarolar sabab ayol 2019-yilda uyni tashlab chiqib ketgan. 2021-yilda esa yana homilador bo‘lib qolgan va tug‘ilajak farzandini sotish yo‘llarini qidirgan.
Sud majlisida ayblanuvchi Jinoyat kodeksining 135-modda (odam savdosi) 3-qismi bilan aybdor deya topilgan va unga 5 yil ozodlikdan mahrum etish jazosi tayinlangan.
T.ning turmush o‘rtog‘i chaqaloq uning farzandi bo‘lmagani sabab uni olib ketishdan bosh tortgan va u bolalar uyiga joylashtirilgan.
Avvalroq Sirdaryoda besh kunlik chaqalog‘ini 5 ming dollarga sotayotgan ona qo‘lga olingani, Toshkentda uch kunlik chaqalog‘ini 9 ming dollarga sotishga uringan ayolga sud hukmi o‘qilgani to‘g‘risida xabar berilgandi.
